
Piştî 15 salan di doza Ûytûn de biryara keşif kirinê 

2024-09-10 17:04:49


	&nbsp;

	ŞIRNEX - Li navçeya Cîzirê zarokê 18 mehî Mehmet Aytûn ji ber fîşeka xaza îsotê ya leşkeran avêtiye jiyana xwe ji dest da. 15 sal piştî bûyerê biryara keşifkirina cihê bûyherê hate dayîn.&nbsp;

	&nbsp;

	Li navçeya Cizîra Şirnexê di sala 2009’an de dema leşkeran mudaxile li çalakiyekê protestoyê kiribûn xaza îsotê avêtibûn û zarokê 18 mehî Mehmet Ûytûn ê fîşeka xaza îsotê jê girtiye jiyana xwe ji dest da. Derbarê bersûcê dozê Hakan Alkan de bi sûcdariya “bi qezayê sedembûna kuştinê” 3 sal 4 meh cezayê hefsê lê hate birîn û ceza hate xerakirin. Bi xerakirina ceza, darizandin li Dadgeha 1’emîn a Cezayê Asliyeya Cizîrê hat lidarxistin. Tevî dê û bav, parêzerên şaxa Komeleya Mafên Mirovan (ÎHD) a Amedê jî di darizandinê de hazir bûn. Leşkerê bersûc Hakan Alkan ê cezayê wî ji ber “lêkolîna kêm” ji hêla Dadgeha Edliyeyê ya Herêma Amedê ve hatiye xerakirin, tev li danişînê nebû.&nbsp;

	&nbsp;

	‘BI QESTA KUŞT’

	&nbsp;

	Bav Tûran Ûytûn ê mafê axaftinê stendiye, destnîşan kir ku kurê wî bi hedefgirtinê hatiye kuştin û wiha got: “Bi qesta zarokê min kuşt. Ev bûyer pêşberî çavê her kesê pêk hat. Em dixwazin were cezakirin.”&nbsp;

	&nbsp;

	GIRTINA BERSÛC HATE XWESTIN

	&nbsp;

	Parêzerê malbatê Yakûp Guven diyar kir ku xerakirina biryara dozê girîng e û destnîşan kir ku keşifkrina li cihê bûyerê dê bûyerê zelaltir bike . Guven daxwaza keşifkirina cihê bûyerê ya dadgeh beriya niha red kiribû dubare kir û ji bo pêvajo bi awayekî tenduristî were meşandin û delîl werin komkirin, daxwaza girtina leşkerê bersûc Alkan kir.&nbsp;

	&nbsp;

	Parêzerê bersûc bi ser Pergala Deng û Dîmen (SEGBÎS) tev li danişînê bû û redkirina daxwaza girtinê xwest.&nbsp;

	&nbsp;

	Dozger xwest daxwazên girtin û keşifkirinê yên parêzer werin redkirin.&nbsp;

	&nbsp;

	DADGEH PIŞTÎ 15 SALAN DAXWAZA KEŞIFKIRINÊ QEBÛL KIR

	&nbsp;

	Dadgeh daxwaza girtina bersûc red kir û ji bo bûyer were zindîkirin ji Fermandariya Tûgaya Zirxî ya Fermandariya Hêzên Bejahiyê re biryara nivîsandina muzekkereyê da. Dadgeh di biryarê de xwest ku roja keşifê ji dadgehê re û biryara muzekkereyê jî ji parêzer û kesê tê darizandin re were gotin.&nbsp;

	&nbsp;

	Dadgeh danişînê taloqî 24’ê kanûnê kir.&nbsp;

	&nbsp;