
KNK: Têkçûna destkeftiyên Rojava têkçûna statuya Başûrê jî

2024-12-09 09:51:14


	NAVENDA NÛÇEYAN - KNK’ê di demeke êriş li ser Bakur û Rojhilatê Sûriyeyê tên kirin de bang li hemû partî, rêxistin û şexsiyetên kurd kir ku bi erk û berpirsyartiyên xwe yên neteweyî rabin.&nbsp;

	Kongreya Neteweyî ya Kurdistanê (KNK) têkildarî geşedanên li Sûriye û Bakur û Rojhilatê Sûriyeyê daxuyaniyeke nivîskî weşand.&nbsp;

	&nbsp;

	Di daxuyaniyê de wiha hate gotin:&nbsp;

	&nbsp;

	"Bûyerên di nav 10-12 rojên bihurî de li Sûriye, Bakûr û Rojhilatê Sûriyeyê de dawî li rejîma Baas ya Esed anîn û rûxandin. Hêzên muxalîf bi serkêşiya Heyet Tahrîr El Şam û hin grubên di bin kontrola dewleta tirk de beşek berfireh ji xaka Sûriyeyê xiste bin kontrola xwe.&nbsp;

	&nbsp;

	Di şer û pevçûnan de Tel Rifet û Herêma Şehbayê ji aliyên grubên bi ser Tirkiye ve hatin dagirkirin û bi deh hezaran xelkê herêmê careke din koçber bûn û niha jî bi mebesta dagirkirinê berê xwe dane herêma Minbicê. Armanc û hedefên Tirkiye û çeteyên di bin kontrola wê de dagirkirina hemû herêma rojavayê Kurdistanê ye.

	&nbsp;

	Geşedanên li tevaya Sûriyeyê rewşek nû aniye holê. Her çendin dawî li rejîma Esad anîbe jî metirsî û gefên metirsîdar li ser xelkên rojavayê Kurdistanê zêdetir bûye û dikare rê li ber qetlîam û trajediyen mirovahî mezin veke û destekeftiyên gelê Kurd têk bibe. Armanca dewleta Tirk dagirkirina rojavayê Kurdistanê ye û pêkanîna qetlîam û guhertina demografiya herêmê di rojeva sereke ya dewleta dagirker ya Tirkiye de ye û hewldanên wê bi hemû rengî diyar dike.

	&nbsp;

	Rixmî hemû gef û mtirsîdariyê li ser rojavayê Kurdistanê, em baş dizanin ku rûpelekî nû di geşedanên dawî de hatiye holê û em hêvîdar in pêşhate û guherînên Sûriyeyê di encamê de bibin sedema wê yekê ku bi rêya diyalogê û hevtêgihiştinê bibe bingeha çareserkirina pirsgirêkan. Her wiha em hêvîdar in ku hemû alî bi awayekî aştiyane bigihîjin peymaneke ku li berjewendiya hemû pêkhatiyan be.&nbsp;

	&nbsp;

	Dewleta Tirk amadekariya êrişên berfireh dike. Niha dewleta Tirk hem ji bejayî hem jî ji hewayî ve êrişî Minbicê dike. Armanc ew e ku ji vir dest pê bike û ber bi Rojava ve biçe. Ji bo vê jî divê gelê me li çar parçeyan û derveyî welat li ber xwe bide.&nbsp;

	&nbsp;

	Di vê qonaxa dîrokê de, divê siyaseta kurd berjewendiyên netewî li pêş her tiştî bigire û derdorên xwe yên dîplomatîk ji bo bidestxistina destkeftiyên li Rojava û Bakurê Rojhilatê Sûriyê seferber be. Divê hemû parti rexistinên Kurdistanî ji bo piştgiriya Rojava daxuyaniyan bidin.&nbsp;

	&nbsp;

	Ji aliyê din ve divê bi dayîna alîkariyên mirovî yên lezgîn ji bi sed hezaran penaberan re erkên xwe yên neteweyî bi cih bîne. Ev mesûliyetek niştimanî û dîrokî ye. Têkçûna destkeftiyên rojavayê Kurdistanê têkçûna destkeftî û statuya Başûrê Kurdistanê ye jî.

	&nbsp;

	Em bi hevîne hemû partî, rêxistin, sazî û kesayetiyên Kurdistanî û gelê Kurd bangewaziya me weke erka niştimanî binasin û li gor wê bi erk û mesûliyetek niştimanî tevbigerin.”

	&nbsp;