
Du girtiyên nexweş di greva birçîbûnê de ne: Heke îro nebe kengî?

2023-12-18 13:44:23


	&nbsp;

	ENQERE - Elîf Çetînbaş û Rihan Kavak Ozbek ên di lîsteya girtiyên nexweş a ÎHD’ê de ne diyar kirin ku dest bi çalakiya greva birçîbûnê kirine û pirsa “Heke îro nebe em ê kengî daxwaza azadiya fizîkî ya birêz Ocalan bikin?” pirsî.&nbsp;

	&nbsp;

	Girtiyên siyasî yên li girtîgehên bakurê Kurdistanê û Tirkiyeyê ji bo azadiya fizîkî ya Rêberê PKK’ê Abdullah Ocalan û rakirina tecrîdê, dest bi greva birçîbûnê ya dorveger kiribûn. Çalakî, di roja 22’yan de didome.

	&nbsp;

	Ji siyasetmedaran Elîf Çetînbaş û Rihan Kavak Ozbek ên di lîsteya girtiyên nexweş a Komeleya Mafên Mirovan (ÎHD) de ne û di nava koma seyêmîn a li Girtîgeha Jinan a Sîncanê ya Enqereyê çalakî dewr girt de cih digirin, bi peyama şandin re banga xwedîderketina li çalakiya greva birçîbûnê kirin.&nbsp;

	&nbsp;

	‘JI BO KU ROJÊN RONÎ BIBÎNIN’ &nbsp;

	&nbsp;

	Elîf Çetînbaş di peyama şand de wiha got: “Di demeke ku her roj 5 jin tên kuştin, aborî di destê hêzên sermayeyê de veguheriye Leviathanayê, netewe dewlet bi avaniya xwe ya faşîst û yekperest, ala xwe ya îflasê kişandine, ekolojî alîkariyê dixwaze de li dijî van hemû krîzan heke ne îro be em ê kengî azadiya fizîkî ya fîlozofê serdemê birêz Abdullah Ocalan ku paradigmaya ‘ekolojîk, demokratîk û azadîxwaziya jinê’ pêş xistiye û pêşkeşî xizmeta gelan kiriye bixwazin?”

	&nbsp;

	Çetînbaş, bi lêv kir ku wê bi hêza têkoşîna hevpar, serbikevin û wiha berdewam kir: “Ji bo birêz Abdullah Ocalan divê herkes berpirsyartiya xwe ya dîrokî bi cih bînin. Me bi çalakiya greva birçîbûnê hewl da vê tarîtiyê ronî bikin û rojên ronî bibînin. Lê rakirina derî û dîwaran bi hewldana me hemûyan pêkan e.”

	&nbsp;

	Rihan Kavak Ozbek jî di peyama xwe de destnîşan kir ku mifteya aştiya gelan a Tirkiyeyê û çareseriya pirsgirêka kurd Rêberê PKK’ê Abdullah Ocalan e û bang kir ku xwedî li çalakiya greva birçîbûnê bê derketin.&nbsp;

	&nbsp;

	‘DIVÊ BÊŞERT Û MERC WERE BERDAN’&nbsp;

	&nbsp;

	Ozbek, di berdewama peyama xwe de wiha got: “Niha hemû cîhan dizane ku mifteya aştiya gelên Tirkiyeyê û çareseriya pirsgirêka kurd birêz Abdullah Ocalan e. Heta aştiya Rojhilata Navîn paradigmaya birêz Abdullah Ocalan a ‘Rojhilata Navîn a Demokratîk e’. Tecrîd sûcê mirovahiyê ye. Divê herkesên ku dibêjin ez demokrat im û gelê kurd li dijî tecrîdê dengê xwe bilind bike. Ji ber vê yekê divê herkes li dengê zindanan xwedî derkeve û bibîhize. Di serî de birêz Abdullah Ocalan hemû girtiyên siyasî bêşert û merc werin berdan.”