NAVENDA NÛÇEYAN – BTS û HABER –SEN’ê bi armanca şermezarkirina sirgun û îxracên endamên xwe ji Amed, Stenbol, Meletî û Îzmîrê ber bi Enqereyê ve dest bi meşê kirin. 

 

Sendîkaya Xebatkarên Veguhêzkariya Yekgirtî (BTS) û Sendîkaya Kedkarên Posta, Ragihandin, Çapemenî û Weşanê (Haber-Sen) yên girêdayî Konfederasyona Sendîkayên Kedkarên Cemaweriyê (KESK), bi daxwaza sirgûn, îxrac û zextên ku di demên dawîn de li hemerî endam, rêveber û nûnerên wan ên li Wezarata Raghandinê dixebitin pêk tên, bi dawî bibin, ji Amed, Stenbol, Meletî û Îzmîrê ber bi Enqereyê ve dest bi meşê kirin.

 

DAXWAZÊN KARKERAN

 

Beriya ku meş dest pê bikin, li Amed, Îzmîr û Stenbolê bi beşdariya endam û rêveberên her du sendîkayan daxuyanî hatin dayîn. Di daxuyaniyan de polîtîkayên desthilatê yên li hemberî karkeran hatin şermezarkirin û hat xwestin ku sirgûn û îxracên endam, rêveber û nûnerên her du sendîkayan bên rawestandin. 

 

PIŞTGIRIYA PARTIYÊN SIYASÎ

 

Li her sê navendan jî nûnerên partiyên siyasî û sendîkayan piştgirî dan BTS û HABER –SEN’ê. Piştî daxuyaniyên ku hatin dayîn meşên ber bi Enqereyê ve dest pê kirin. Di 4’ê sibatê de milên meşê dê li Enqereyê bigihîjin hev û li vir bi awayekî girseyî daxwazên xwe bînin ziman. 

 

‘NEYÊN ENQEREYÊ’

 

Di daxuyaniya Stenbolê de Serokê Giştî yê PTT-SEN’ê Halît Buyuk, diyar kir ku ji Şaxa Ewlehiyê ya Miduriyeta Polisan a Enqereyê çend caran lê  geriyane û jê re gotine ku neyên Enqereyê.