Ji piştevanên kampanya "Azadî ji Abdullah Ocalan re, çareseriya siyasî ji pirsgirêka kurd re" Sekreterê Neteweyî yê Yekîtiya Partîzanên Îtalyayê (ANPI) ku bi sed hezaran endamên xwe hene Fabrizio De Sanctis, ji Ajansa Nûçeyan a Firatê (ANF) re li ser tecrîda li Îmraliyê û bûyerên dawî axivî.

 

HEVDÎTIN GELEKÎ ERÊNÎ YE

 

Sekreterê Neteweyî yê ANPI Fabrizio De Sanctis anî ziman ku hevdîtina li Îmraliyê gaveke erênî ye, lê belê kêm e û destnîşan kir ku dîlgirtina Abdullah Ocalan bi temamî dîlgirtina gelê kurd e. De Sanctis got: "Hevdîtina ku bi Abdullah Ocalan re hate kirin teqez gelekî erênî ye. Ocalan ji aliyê bi milyonan Kurdan ve weke lîderê siyasî tê dîtin. Min jî firsend dît ku serdana Amedê bikim û bi nûnerên gelek komeleyan re hevdîtinê bikim. Her carê hate gotin, mehkûmkirina Ocalan tê wateya mehkûmkirina Kurdan hemûyan. Ev rewş weke astengkirina azadiya siyasî ya Kurdan tê dîtin; eger lîderê wan li vê yekê rast tên, hingî difikirin ku ji bo wan jî wê encamên nebaş rû bide."

 

DI ÇARESERIYA PIRSGIRÊKÊ DE NEBE NABE

 

De Sanctis destnîşan kir ku Abdullah Ocalan di çareseriya pirsgirêka kurd de nebe nabe û got: "Bi dîtina min ev hevdîtin dikare bibe ronahiyeke biçûk ku ji bo çareseriya aştiyane ya pirsgirêka Kurd a li Tirkiyeyê veguhere rojeke mezin. Ji bo çareseriya pirsgirêka Kurd firsendeke mezin heye, di rewşeke bi vî rengî de ji nû ve qedexekirina hevdîtinên bi Ocalan re rewşeke gelekî cidî ye. Xuya ye li ser tedbîreke nû ya tecrîdê biryar hatiye dayin û ceza çend mehên din hatiye dirêjkirin. Dûrxistina sê şaredarên hilbijartî jî di nava vê de ye."

 

PÊWÎSTÎ BI WÊREKIYA SIYASÎ HEYE

 

Sekreterê Neteweyî yê ANPI Fabrizio De Sanctis ragihand ku Abdullah Ocalan di peyama xwe de ya ji bo raya giştî şand, bi şênberî nîşan da ku ew alîgirê çareseriya siyasî ya pirsgirêka Kurd e û got: "Peyama Ocalan peyamek bi dilxwaziya ji bo aştiyê ye. Divê destûr jê re bê dayin ku karibe bi roleke siyasî rabe. Ji bo nîqaşkirina şert û mercên çareseriya rêyên siyasî û aştiyane yên pirsgirêka Kurd divê ji bo Meclîsa Tirkiyeyê bê vexwendin. Ji bo rû bi rû bûna siyasî ya vê rewşê û axaftina bi Birêz Ocalan re ku bi milyonan mirovî temsîl dike, pêwîstî bi wêrekiyê heye."

 

JI BO ÇARESERIYÊ DIVÊ AZAD BIBE

 

De Sanctis destnîşan kir ku ji bo Abdullah Ocalan di çareseriya pirsgirêka Kurd de karibe bi rola xwe rabe, divê bi rengekî fîzîkî azad bibe û got: "Ocalan divê weke mirovekî azad karibe biaxive. Karibe bi rengekî azad biaxive, diyalogê bi hevrê, endamên partiyê û gelê xwe re dîne. Ji bo karibe pozîsyona xwe ya siyasî îfade bike û nîqaş bike, divê xwedî hemû amûran be. Ji bo karibe bi roleke rastî ya siyasî rabe divê azad bibe."