Tevgera Jinên Azad (TJA) û Meclîsa Jinan a Partiya Demokratîk a Gelan (HDP), derbarê komkujiya DAIŞ’ê ya li dijî Êzidiyan a di 3’yê Tebaxa 2014’an pêk hat de daxuyanî dan çapemeniyê. Daxuyanî li avahiya HDP’ê ya Navçeya Wêranşarê hat lidarxistin û êzidiyên di komkujiyê de hatibûn qetilkirin, hatin bibîranîn.  

 

Polîsan berî daxuyaniyê avahiya navçeyê dorpêç kirin û nasnameya jinên hatin avahiyê di GBT’ê re derbas kirin. Gelek jinên li avahiya navçeyê kom bûn, laçik dan serê xwe û li ber avahiyê daxuyanî dan çapemeniyê. 

 

Aktîvîsta TJA’yê Çigdem Karageçîlî, di daxuyaniyê de axivî û wiha got: “Jin û zarokên Êzidî bi awayekê pergalî rasatî tecawizên DAIŞ’iyan hatin, di bazarên koleyan de hatin firotin, hatin îşkence kirin û tundî li wan hat kirin. Mîtîtarîzma ku ji pergala desthilatdariya zilam pêk tê, li ser bedena jin û zarokan, dixwaze hişmendiya xwe ya zilamê serdest ava bike.” 

 

BERPIRSIYARTIYÊ BIGIRIN

 

Karageçîlî, di dewama axaftina xwe de wiha bilêv kir: “Em weke jinên TJA’yî, heya ku 3’yê Tebaxê bibe ‘Roja Çalakiya Navneteweyî Ya Li Dijî Tevkujî û Komkujiya Jinan’ li qadan têkoşîna xwe dewam bikin. Divê jinên Êzidî ji civakan neyin tecrîdkirin û dawî li komkujiya çandî bên anîn. Pêwîste ku hemû bersûc derkevin pêşberî dadgehek serbixwe ya navneteweyî û bên cezakirin. Divê Ewropa êdî dest ji polîtîkayên xwe yên windakirina şopên Komkujiya Jinên Êzidî û Şengalê berde. Lazime ku di vî warî de rêxistinên jina, rêxistinên hiqûqî û baro berpirsiyariyê bigirin ser xwe.” 

 

Jin piştî daxuyaniyê de, ketin avahiya navçeyê û sînevîzyona têkilarî Komkujiya Şengalê temaşe kirin.