Serokê Giştî yê Partiya Memleketê Muharrem Înce di 4'ê Heziranê de di qanalek Tv de gotibû, “Kurdî ji aliyê pedagojik de ne guncav e. Ne li gorî pedagojîyê ye". Li dijî vê gotina Înce bertek û nerazibûnên sazî û rêxistinên Kurdan zêde bûn. Serokê Navenda Mafê Zarokan ê Baroya Amedê Prz. Mehmet Emîn Gun, bertek nîşanî Înce da. Prz. Gun anî ziman ku li gorî destûra bingehîn her zarok xwedî maf e ku bi zimanê zikmakî perwerdehiyê bibînin û wiha got: "Her zarok xwedî mafê destûra bingehîn e ku bi zimanê zikmakî bêne perwerdekirin. Daxuyaniya Înce ji bo me pir bi fikar in. Tevlebûna Înce ya Siyasetê ji bo hemû zarokan tiştekî baş e. Ji ber ku êdî dê kesekî wekî Înce zerarê nede zarokan. Lê mixabin gelek siyasetmedarên wekî Muharrem Înce difikirin hene." 

 

'EV REZALETA POLÎTÎKAYA PERWERDEHIYÊ YE' 

 

Prz. Gun, anî ziman ku daxuyaniya Înce, polîtîkaya perwerdehiya Tirkiyeyê radixe ber çavan û wiha axivî: "Li vî welatî dema Perwerdehiya Zimanê Zikmakî tê gotin, Muharrem Înce jî navde, Perwerdehiya Zimanê Kurdî tê aqilê gelek mirovan. Di van kesan de fikra "Dê welat perçe bike" pêş dikeve. Dema Înce got "Kurdî ne li gorî pedagojiye ye" em heyîrî man. Ev berhemê hişê dehşetê ye. Ev gotin hişmendiya wî ya "Zaroken Tirkan serdestî zarokên Kurdan in" nîşan dide. Li gorî feraseta wî 'Tirkî serdestî Kurdî ye'" 

 

'EV PEDAGOJIYA FAŞÎZMÊ YE' 

 

Parêzer Gun, destnîşan kir ku beriya dest bi pîşeyê parêzeriyê bike, mamostetiya pêşdibistaniyê dikir û wiha axivî: "Perwerdehiya pêş dibistanê, li cîhanê ji bo Pergala Perwerdehiya Hemdem gelek girîng e. Lê li Tirkiyeyê armanca vê yekê ewe ku çawa zarokan ji zimanê zikmakî dûr bixe ye. Bi vê pergala "Pêşdibistanê" armanc dikin ku çawa hemû zarokan ji zimanê wan dûr bixin û fêrî tirkî bikin. Îro li hemû gundên ku Kurd lê dijîn perwerdehiya Pêşdibistanê" tê dayîn. Li gundê ku av û ceyran lê tune ye, ev perwerdehî tê dayîn. Ji ber ku hişmendiya dewletê ya 'Pêdiviya zarokên Kurdan beriya av, rê û ceyranê bi Tirkî heye' heye. Pedagoyiya ku Înce qal dike pedagojiya faşîzmê ye. Ji ber pedagojiya em dizanin, perwerdehiya bi zimanê zikmakî gelek mûhîm û pêwist e." 

 

PERWERDEHIYA ZIMANÊ ZIKMAKÎ

 

Prz. Gun, destnîşan kir ku berî her tiştî li gorî Peymana Mafên Mirovan a Zarokan a Neteweyên Yekbûyî, her zarok xwedî maf e ku bi zimanê zikmakî perwerde bibe û wiha bi dawî kir: "Ev maf bi zagonan û peymanan hatiye mîsogerkirin. Piştî ku Tirkiye ev xal îtîraz kir, li Tirkiyeyê mafê zarokan ê zimanê zikmakî hat asteng kirin. Li Tirkiyeyê zarokên ku nikarin bi zimanê zikmakî perwerde bibin gelek pirsgirêk dijîn. Pisporên perwerdehiya pedagojiyê diyar dikin ku zarokên nikaribin bi zimanê zikmakî perwerde bibin, ji xwe ne bawer in. Nikarin bi axivîrinin. Di aliyê serkeftina akademik û pêşketina psiko-civakî û pêşketina hiş de li paş dimînin. Dema zarok bi zimanê zikmakî perwerde debin, di aliyê hest û ramanê de jî pêş nakevin. Nikarin fikr û hestê xwe bînin ziman. Dîsa zarok rêza li hemberî xwe jî winda dikin. Dîsa ev dibe sedem ku zarok ji çand, ziman û nasnameya xwe bêzar bibe." 

 

TÊKOŞÎNA ZIMAN 

 

Prz. Gun, herî dawî bal kişand ser girîngiya zimanê zikmakî ya zarokan û wiha bi dawî kir: "Zimanê zikmakî hişê çandî derbasî pêşerojê dike. Vê yekê tîne ziman û parve dike. Dema zarokek bi zimanê nayê zanîn perwere dibe, bê ziman tê hiştin. Ez tu carî zarokantiya xwe ji bîr nakim. Min nedixwest bavê min bê dibistanê. Ji ber ez nikarîbûm bi tirkiyek baş bi axiviyama. Min ji bavê xwe şerm dikir. Piştî ez mezin bûm û min dît ji ber min ji bavê xwe şerm dikir û ez ji xwe şerm dikim, vê carê min ji vê şermê şerm kir. Yanî vê dewletê em di nava şermê de pêçane. Em xiztine zindana şermê. Divê tu zarok ji dayik û bavê xwe şerm nekin. Ev têkoşîna ziman têkoşînek pîroz e. " 

 

MA / Eylem Akdag