STENBOL - Îkbal Eren a ku 41 sal in ji bo birayê xwe yê mezin Hayrettîn Eren ê ku di binçavan de hat windakirin têdikoşe, li ser gotina Kemal Kiliçdaroglû ya “hevhelalkirin” wiha got: “Em hevhelalkirinê û rûbirûbûnê em tevlihev nekin. Ez bi yên ku vê zilmê li me dikin re, hevhelal nabim.” 

 

Dayikên Şemiyê ji bo aqûbeta xizmên xwe yên di binçavan de hatin windakirin bipirsin û kiryar bên darizandin di hefteya 869'an de çalakiya xwe li dar xistin. Dayikên Şemiyê vê hefteyê jî ji ber vîrûsa koronayê li ser înternetê çalaki li dar xistin û li aqûbeta Hayrettîn Eren ê ku di 21'ê Mijdara 1980'an de li Saraçhaneya Stenbolê ji aliyê polîsan ve hat binçavkirin, careke din agahî jê nehat girtin pirsîn. 

 

TÊKOŞÎNA 41 SALAN 

 

Xwişka Hayrettîn Eren, Îkbal Eren bal kişand ser wê yekê ku tevî îfadeya 5 kesan jî aqûbeta birayê wê nehat aşkerakirin. Eren da zanîn ku edalet pêk nayê û got: “41 sal in em têkoşîna edaletê didin. Di vê têkoşînê de me dayîk, bav, birayên xwe winda kirin. Dê û bavê min nekarîn aqûbeta kurê xwe zanibin û şîna wan qet naqediya. Li cihê ku wan hişt em ê têkoşîna xwe didomînin."

 

ÎTÎRAFÊN EYMÛR Û PEKER 

 

Eren anî ziman ku di van mehên dawî de li Tirkiyeyê rewşên nenormal diqewimin û got: "Patronê mafyayê (Sedat Peker) derdikeve û Mehmet Agar wekî îşkencekar û berpirsyarê kuştinên kiryar nediyar radigihîne. Mehmet Agar bixwe jî gotibû, ‘Eger ez kerpîçekî bikişînim wê dîwar hilweşe û her kes bikeve binê wê’.Heger dozgerên vî welatî hebin, we nebihîst, ma hûn vî mafya û Mehmet Agar nabihîzin? Mehmet Eymür bi serbestî îtîraf dike ku wî îşkence kiriye û sûcên li dijî mirovahiyê kiriye. Me her tim dipirsî, ‘Kiryar û hin windahî li ku ne?’ Me got ku berpirsiyarê windahiyên me Mehmet Eymûr e. Dozger rabûne dozan li Dayikên Şemiyê vedike, ma hûn bi xwe vî kujerî nabihîzin?" 

 

HEVHELALKIRIN Û HESABDAYÎN 

 

Eren bal kişand ser gotina Kemal Kiliçdaroglû ya “hevhelalkirinê” jî û wiha got: “Ji min tê xwestin ku ez çi bikim? Ma ji min tê hêvîkirin ku bi wan kesên ku birayê min îşkence kirin, kuştin û wêran kirin re bibêjim, "Weleh xelet e, em xatirê xwe ji bîr bikin û ji bîr bikin?" Tiştek e ku em her tim dixwazin ku ev kujer bên darizandin û bi malbata min re rûbirû bibin. Em hevhelalkirinê û rûbirûbûnê em tevlihev nekin. Ez bi yên ku vê zilmê li me dikin re, hevhelal nabim. Heger hûn bêjin helal, ne mimkûn e ku ez xatirê xwe ji wan kesên ku mafê jiyanê yê birayê min ji binpê kirin ên ku 41 sal in vê zilmê li me dikin hevhelal bikin.” 

 

‘BERPIRSIYAR DEWLET E’ 

 

Xizma Hayrettîn Eren, Setenay Yarici jî vê hefteyê metna daxuyaniyê xwend. Yarici diyar kir ku berpirsyariya windakirina Hayrettîn Eren dewlet e. Yarici anî ziman ku parastina kiryaran polîtîkayeke dewletê ye û got: “Lêpirsînên di derbarê windakirinên di girtîgehê de tên kirin, ji aliyê hiqûqî ve ne mimkûn e ku peywirdarên cemaweriyê yên ku di sûcê de cih girtine, ji ber ku li dijî hiqûqa sûcê madî tên kirin, nekarin bên dîtin û darizandin. Ji ber ku îtîrafên îşkence, windakirin û kuştinên siyasî yên ku ji aliyê rayedarên cemaweriyê yên burokratên asayîşê yên payebilind ên bi agahiya dewletê ve tên kirin, li ber çavên dewletê bi bêdengiyê re rû bi rû dimînin û tê xwestin normalîze bibin.” 

 

Yarici destnîşan kir ku divê aqûbeta Eren were zelalkirin, li dijî wî sûcê mirovahiyê hatiye kirin û ew ê dest ji têkoşîna xwe ya edaletê û Meydana Galatasarayê bernedin.