ŞIRNEX - Kujer Metîn Şengil li gel ku biryara dûrxistinê hebû jî Bêrîvan Alturk qetil kir û beriya doza hevberdanê jî gefa kuştinê li parêzerê Alturk xwar. Her wiha hat zanîn ku kujer Şengil di dema pêvajoya hevberdanê de gef li şandeya dadgehê jî xwariye. 

 

Kujer Metîn Şengil di 21’ê nîsanê de li navçeya Qileban a Şirnexê bi çekan êrişî jina bi navê Bêrîvan Alturk (Mîhrîban) ku 24 roj berê ew berdabû û keça wê ya 8 salî kir. Alturk di êrişê de birîndar bû û li nexweşxaneyê jiyana xwe ji dest da. Keça Alturk a 8 salî jî hêjta li nexweşxaneyê tê dermankirin. 

 

Hat zanîn ku Bêrîvan Alturk ji ber tundiya sîstematîk û gefên kuştinê yên domdar ên kujer Metîn Şengil, gelek caran li qereqolan giliyê Şengil kiriye lê tevî vê yekê jî hêzên ewlekariyê tu tevdîrek negirtine. Derket holê ku Alturk li dadgehê jî rastî gefên kujer Şengil hatiye lê li gel vê yekê jî ji bo parastina Bêrîvan Alturk tiştek nehatiye kirin. 

 

MALBATA FAÎL CERDEVAN E

 

Kujer Metîn Şengil piştî qetilkirina Alturk ji cihê bûyerê reviya û li navçeyê du rojan xwe di malekê de veşart. Hat zanîn ku bav û kekê kujer Şengil cerdevan in û li gel ku bi ser bûyerê re 2 roj derbas bûn jî nehate girtin. Piştî ku peyama “heke tu teslîm nebî em ê çeka bav û kekê te jê bistînin’, çû Midûriyeta Emniyetê ya Qilebanê û xwe teslîm kir. 

 

Piştî kar û barên îfadegirtinê ya li midûriyeta emniyetê jî sewqî dozgeriyê hate kirin. Dozger bi daxwaza girtinê kujer Şengil şand dadgehê û dadgehê jî bi sedema “kuştina bi qesdî” biryara girtinê da û şande Girtîgeha Tîpa T a Şirnexê.” 

 

CÎNAYET DIHAT TEXMÎNKIRIN 

 

Rêzegeşedanên ku Bêrîvan Alturk ber bi qetilkirinê ve birin nîşan dide ku beriya cînayetê, dihat zanîn ku dê Alturk were qetilkirin. Ev yek, her wiha rola daraz û emniyetê ya di vê cînayetê de jî radixe ber çavan. 

 

Bêrîvan Alturk di sala 2012’an de bi Metîn Şengil re zewicî û 2 zarokên wê çebûn. Di tevahiya zewaca xwe de rastî tundiya fîzîkî û derûnî hat. Ji ber vê tundiyê jî gelek caran hewlda ku kujer Metîn Şengil berde û xwe spart cem malbata xwe. Lê belê her carê rûspiyên malbatê ketin navberê û piştî “qanehkirina” Alturk jî ew neçarî vegera malê kirin. 

 

RAKIRIN NEXWEŞXANEYÊ

 

Tundiya li ser Alturk roj bi roj zêdetir bû û di sala 2015’an de tundiyeke ewqas giran lê hat kirin ku rakirin nexweşxaneyê. Piştî tedawiyê jî ji bo berdana kujer Metîn Şengil doz vekir. Rûspiyên malbata kujer Şengil vêcarê ketin navberê û bi tundiya derûnî ya “Ji me piştrast be ku dê êdî wisa neke” re kirin ku Alturk neçar bimîne 2 meh piştre dev ji doza xwe berde.

 

Lê belê tundiya kujer Şengil a li ser Alturk bi dawî nebû. Alturk, di cotmeha sala 2021’an de dîsa rastî tundiyê hat û biryara berdanê da. Doza berdanê di 20’ê kanûna sala 2021’an de hate vekirin û di 28’ê adarê de jî biencam bû. Bi vê yekê re Bêrîvan Alturk dev ji kujer Şengil berda. 

 

GEFA KUŞTINÊ LÊ HAT XWARIN

 

Bêrîvan Alturk, di pêvajoya berdanê de gelek caran rastî gefa kuştinê ya kujer Şengil hat. Li ser vê yekê giliyê kujer Şengil kir û ji bo kujer Şengil biryara dûrxistinê ya 6 mehan hate dayîn. Bi bidawîbûna biryara ji bo 6 mehan jî Alturk dîsa bi sedema “gefa kuştinê li min tê xwarin” biryara dûrxistinê da girtin. 

 

3 CARAN BIRYARA DÛRXISTINÊ BINPÊ KIR

 

Lê kujer Şengil biryara dûrxistinê binpê kir. Dema cara ewil kujer Şengil biryara dûrxistinê binpê kirî, cezayê 3 rojan ê girtinê lê hat birîn. Kujer Şengil 3 roj piştre dîsa biryara dûrxistinê binpê kir û vê carê cezayê girtinê yê 5 rojan lê hat birîn. Dema kujer Şengil cara sêyemîn biryar binpê kirî jî vêcarê cezayê girtinê yê 15 rojan lê hat birîn. Di roja 15’emîn de jî endamên malbatê zext li Bêrîvan Alturk kirin ku ji giliyê xwe lêve bibe. Li ser tundiya endamên malbatê, Alturk ji giliyê xwe lêvebû. Kujer Şengil ê ku hatibû berdan, bi berdanê re dîsa dest bi gefan kir. 

 

GEF HEM LI PARÊZER Û HEM JÎ LI DADGEHÊ XWAR

 

Kujer Şengil ku her carê bêceza hate hiştin, êdî tu sînor nas nekirin û parêzer û şandeya dadgehê jî di nav de, gefa kuştinê li hemû kesên di dema pêvajoya hevberdanê de piştgirî didan Alturk xwarin.  Kujer Şengil gefa “Ez ê bombeyê biavêjim mala te û hem te û hem jî malbata te bikujim” li parêzerê Alturk xwar. Di roja doza berdanê de jî kujer Şengil li şandeya dadgehê zîvirî û gef lê xwar: “Kî malbata min ji hev belav bike, ez ê wan sax nehêlim.” 

 

TUNDIYA LI SER ALTURK PIŞTÎ HER “QANEHKIRINÊ” ZÊDETIR BÛ 

 

Di encama van binpêkirina de, Bêrîvan Alturk 24 roj piştî ku dev ji kujer Şengil berdayî li gel ku biryara dûrxistinê hebû jî nehat parastin û hate qetilkirin. Di êrişê de zaroka wê bi giranî birîndar bû. Alturk li pêş çavên xwîşka wê Taybet Uren (35) hate qetilkirin. Têkildarî bûyerê xwîşka wê Uren bi ajansa me re axivî û bal kişand ser xemsariya daraz û emniyetê. 

 

Uren, da zanîn ku ji roja zewicî heta roja hatiye qetilkirin, xwîşka wê her tim rastî tundiyeke sîstematîk hatiye û wiha got: “Metîn, her carê hincetek didît û li xwîşka min dixist. Xwîşka min vedigeriya malê. Li ser vê yekê jî Metîn rûspiyên malbatê dixist navberê û digot; ‘ez ê poşman im, min xeletiyek kir û dê êdî nekim.’ Bi van gotinan jî Bêrîvan ji bo vegere malê qaneh dikir. Lê dawiyel li tundiyê nedihat.” 

 

QAŞO BERGIRIYÊN PARASTINÊ GIRTINE!

 

Bi domdarî Uren anî ziman ku bûye şahida tundiya ku kujer Şengil di cotmeha 2021’an de li xwîşkê wê dikir û wiha domand: “Bêrîvanê got ku Metîn tundiyê li wê dike. Dê biçûya nexweşxaneyê lê Metîn destûr nedida. Piştre bi serê zarokên xwe sond xwar ku dê giliyê wî neke. Li ser vê sondê jî Metîn destûr da ku biçe nexweşxaneyê. Di ketina nexweşxaneyê de Bêrîvanê bo min peyamek şand û got; ‘li emniyetê bigere.’ Min jî li ser vê peyamê demildest agahî da malbata xwe. Me ji nexweşxaneyê raporê derbkirinê hilgirt. Li ser vê yekê jî dîsa doza berdanê vekir.” 

 

'QANÛNÊN HEYÎ JINAN NAPARÊZIN’

 

Uren, destnîşan kir ku piştre jî pêvajoya dadgehê dest pê kir û axaftina xwe wiha bi dawî kir: “Di vê demê de Metîn gelek caran gefa ‘ez ê te, bavê te, xwîşk û birayên te bikujim’ li Bêrîvanê dixwarin. Piştî ku Bêrîvanê ev gef qeyd kirin û gilî kir, biryara dûrxistinê hate dayîn. Me bihîst demek piştre çûye Antalyayê. Roja ku xwîşka min hatiye qetilkirin, me digot qey li Antalyayê ye. Ji bo ku biçin sûkê em wê rojê derketin derve. Demekî kin piştre wesayîtek hat li pêşiya me sekinî. Bêrîvanê got; ‘Metîn’ xwe da pişt min. Metîn jî bi lez û bez ji wesayîtê paya bû û berê çekê da me. Dema bi çekê ve ber bi me ve dihat, hewl da xwîşka min birevîne. Min jî devê çekê girt. Di navbera me de rageşî derket û di wê navberê de 3 gule berdan. Li ser vê yekê ez jî aloz bûm û çek ji destê min ket. Piştre jî gule li Bêrîvanê reşandin. Dema gule reşandîn, Bêrîvan kete erdê. Piştre 3 gule lê dan. Xwîşka min bi awayekî plankirî hate qetilkirin. Bi qanûnên heyî rê li ber cînayetên jinan nayê girtin. Nexwe her roj li Tirkiyeyê jin nedihatin qetilkirin.” 

 

MA / Omer Akin