NAVENDA NÛÇEYAN - Meclisa Leşkerî ya Suryan bi daxuyaniyekê ragihand ku 2 şervanên wan di êrişa Tirkiyeyê ya li ser gundên navçeya Til Temirê de jiyana xwe ji dest dane. 

 

Fermandariya Giştî ya Meclisa Leşkerî ya Suryan, duh têkildarî 2 şervanên xwe yên di encama êrişa Tirkiyeyê ya li ser gundên Til Temirê de jiyana xwe ji dest dan, daxuyaniyek da.

 

Daxuyaniya Meclisa Leşkerî ya Suryan wiha ye: 

 

"Welatiyên gelê Suryan-Asûrî bi hevkarên xwe li Sûriyê hemû herêmên xwe ji terorê rizgar kirin û şerê tundtirîn rêxistinên terorê mîna DAIŞ’ê kir, di Reqa û Baxozê de têk birin. Lê temenê rizgarkirinê jî karwanê şehîdan bû ku li hember parastina xak û gelê xwe dudil nebûn.

 

Şervanên Meclisa Leşkerî ya Suryan ji destpêka êrişên li ser Bakur û Rojhilatê Sûriyê ve di eniyên pêş de parastina destkeftiyên gel û şehîdên xwe kir.

 

Bi êrişên dewleta Tirk û komên wê re ku di vê dawiyê de windahiyên mezin di nava welatî û leşkerî de çêbûn; 2 şervanên me jî gihaştin asta şehadetê.

 

Dijmin hîna di binpêkirinên peymanên navneteweyî û biryarên Konseya Ewlehiyê ya Neteweyên Yekbûyî de berdewam in. Rojane eniyên bi ser sînor ve tên topbarankirin û windahî û zirar çêdibin û bi hezaran welatî koçber dibin.

 

Em Meclisa Leşkerî ya Suryan soz didin şehîd û tevahî gelên herêmê ku parastina gelê xwe bikin û nahêlin dijmin komkujiyên din pêk bînin."

 

Duh artêşa Tirk a dagirker gundên Dirdara û Qibor Qeracine yên Til Temirê topbaran kirin, di encamê de 2 şervanên Meclisa Leşkerî ya Suryan; Yûsiv Muhsin Mitras û Radî Mizel Osman şehîd bûbûn."