ENQERE - Hevseroka Giştî ya HDP’ê Pervîn Buldan bal kişand ser Rêberê PKK’ê Abdullah Ocalan ku derneketibû hevdîtina CPT’yê û wiha got: “Muxatabên me Wezareta Dadê û û dewlet e. Divê Desthilatdarî û Wezareta Dadê tavilê daxuyanî bidin.” 

 

Meclisa Partiyê ya Partiya Demokratîk a Gelan (HDP), li Avahiya Pêvek a Navenda Giştî ya li Balgat’ê civiya. Tecrîda li Îmraliyê û êrişên AKP-MHP’ê yên li dijî Bakur û Rojhilatê Sûriyeyê mijarên sereke yên civînê ne. Meclisa Partiyê her wiha dê ji bo Hilbijartinên Serokkomariyê û yên giştî stratejiya xwe diyar bike û profîla namzet nîqaş bike. 

 

Hevseroka Giştî ya HDP’ê Pervîn Buldan, di civîna Meclisa Partiyê de axivî. Buldan, di serî de Serokê Baroya Amedê yê berê Tahir Elçî bi bîr anî û got ku ji bo cînayetên kiryarnediyar di tarîtiyê de neyên girtin weke HDP’ê çi ji destê wan bê dê bikin. 

 

‘BI DIRÛŞMA JIN, JIYAN, AZADÎ MEŞIYAN’ 

 

Di berdewamê de Buldan bal kişand ser çalakiyên 25’ê Mijdarê Roja Têkoşîna li Dijî Ser Jinê ya Navneteweyî û wiha got: “Di tevahiya hefteyekê de em li gel ji jinên hemû rengan li qadan û kolanan bûn. Me daxwaz û îtîrazên xwe anîn ziman. Me 25’ê Mijdara îsal diyarî Nagihan Akarsel û Jîna Emînî kir û dirûşma ‘jin, jiyan, azadî’ li qadan qêriya. Tundiya li ser jinê di hefteya 25’ê Mijdarê de jî berdewam kir. Du roj berê Serdozgeriya Komarê ya Enqereyê derheqê 50 jinan de biryara binçavkirinê da. Piştre jî operasyon hatin kirin û jin hatin binçavkirin. Ev operasyon li dijî jinên siyaseta demokratîk dikin hat kirin. Her wiha operasyoneke tolhildanê ye. Tirsa ji muxalefeta jina ye. Her wiha amadekariyeke ji bo hilbijartina sala 2023’yan e. Lê divê were zanîn ku jin dê tu carî li hemberî girtin, binçavkirin, zext û îşkenceyên we serî netewînin.”

 

ÊRIŞÊN LI DIJÎ ROJAVA

 

Bi domdarî Buldan, bal kişand ser êrişên AKP-MHP’ê yên li dijî Bakur û Rojhilatê Sûriyeyê û wiha got: “Çend hefte berê li Taksîmê li dijî sivîlan êrişeke bombeyî hat kirin. Pirsên têkildarî vê teqînê hêj jî didomin. Li holê gelek aliyên ku hev nagirin hene. Desthilatdariyek li pêşberî me ye ku li pey serkeftinan ketiye.”

 

AGAHÎ JI ABDULLAH OCALAN NAYÊN GIRTIN

 

Buldan têkildarî tecrîda girankirî ya li ser Rêberê PKK’ê Abdullah Ocalan axivî û wiha dirêjî da axaftina xwe: “Divê tevahiya vî welatî bibe şahidê vê tecrîda derhiqûqî û ne bi edalet a li ser birêz Ocalan. Em li her deverê û her demê dibêjin ku ji 3’yê adara sala 2020’an heta niha ji birêz Ocalan û girtiyên din agahî nayên girtin. Tevî vê yekê jî tecrîda heyî roj bi roj kûrtir dikin û guh nadin van bangawaziyan. Di hevdîtina ser telefonê ya di 25’ê adara 2021’an de telefon hat qutkirin û ji wê rojê heta niha jî tu agahî jê nayên girtin. 

 

MUXATABÊ ME DEWLET E

 

Buroya Hiqûqê ya Sedsalê duh ragihand ku CPT çûye Îmraliyê lê belê birêz Ocalan nexwestiye bi wan re hevdîtinê bike û pê re hevdîtin nekiriye. Vê agahiyê di serê me tevan de rê li ber fikarên mezintir vekir. Divê sedema vê rewşê di zûtirin demê de bê aşkerakirin. Divê rayedar tavilê têkildarî mijarê daxuyaniyê bidin. Muxatabê me Wezareta Dadê û dewlet e. Weke hevserokan me demek berê ji bo çûyîna Îmraliyê serî li Wezareta Dadê da. Ew serlêdana me hêjta li ser maseyê ye. Heta niha jî erênî yan jî neyînî tu bersiv nedane. Ne heq û ne jî hedê tu kesî heye ku bi xemsarî nêzî vê mijarê bibe. Divê desthilatdarî û wezîrê dadê tavilê di vê mijarê de daxuyaniyê bide. 

 

DIVÊ CPT AGAHIYAN PARVE BIKE

 

Divê CPT agahiyên ber destê xwe tavilê bi raya giştî re parve bike û nebe şirîkê van sepanên derhiqûqî yên desthilatdariyê. Ez li vir bang li CPT’yê dikim; weke HDP’ê heta ku ev mijar zelal dibe û heta ku serlêdanên parêzeran tên qebûlkirin em ê hewldanên xwe bidomînin.” 

 

Piştî axaftina Buldan, civîn ji çapemeniyê re girtî dom kir.