AMED/ ÊLIH - Xizmên Windayan û rêveberên ÎHD’ê li aqûbeta Îkram Îpek, Servet Îpek û Seyîthan Yolûr ên di sala 1994’an de hatin windakirin pirsîn û li kujerên Husnu Kaçar Kaçar, Halîl Erzen, Rafet Ozer û Abdulcelîl Kaçar ên di heman salê de hatin qetilkirin pirsîn. 

 

Xizmên Windayan û rêveberên Komeleya Mafên Mirovan (ÎHD) a Şaxa Amedê çalakiya bi daxwaza “Bila winda bên dîtin û kujer bên darizandin” di hefteya 745’emîn de li dar xist. Çalakî li ber Bîrdariya Mafê Jiyanê ya li Parka Koşûyolû hat pêk hat. Xizmên Windayan, rêveberên ÎHD’ê, Hevseroka Giştî ya Egîtîm Senê Necla Kûrûl û endamên Odeya Tabîban a Amedê tev li çalakiyê bûn û wêneyên windayan hildan.

 

Hevseroka Egîtîm Senê Necla Kûrûl di çalakiyê de axivî û wiha got: “Em dixwazin êdî kes neyê windakirin. Bila ciwanên me b idi siberojê de neyên windakirin. Em li cem Dayikên Şemiyê ne. Bi salane dixwazin xeberê ji zarokên xwe bigirin. Ji ber bêcezahiştina dewletê hê jî li zarokên xwe digerin. Ji bo ev di siberojê de neqewimin em ê xebatên xwe bidomînin.” 

 

Vê hefteyê li aqûbeta Îkram Îpek, Servet Îpek û Seyîthan Yolûr ên di 18’ê gulana sala 1994’an de li navçeya Pasûra Amedê hatin windakirin, hat pirsîn. Sekreterê ÎHD’a Amedê parêzer Yakûp Guven vê hefteyê daxuyanî bi zaravayê zazakî xwend. 

 

BO BÎRANÎNA HER SÊ QURBANIYAN DAXUYANIYA ZAZAKÎ

 

Daxuyaniya zazakî ku ji hêla Guven hat xwendin wiha ye: 

 

“Goreyê vatişanê keye û merdimanê vîndîkerdeyan; Tarîxê 18ê Gulane 1994î de saete heşt û nîmeyê sere sibayî de esker û cerdevanan bi tank û panzeran operasyon bi mezraya Gomakî (Çaylarbaşı) yê dewa Turalli kerd. Esker û cerdevanan hêrîş de heme şarî meydanê mektebî de kom kerdê û tewrê eşya û heywananê zereyî adir nayê heme ban û axûran a.

 

Dima ra Seyîthan YOLUR, Servet ÎPEK, Îkram ÎPEK, Abdulkerîm YOLUR, Saît YOLUR û Mehmet Nûrî YOLUR vistê zereyê yew erebeyî û ver bi qezaya Licêyî ya berdê. Abdûlkerîm, Saît û Mehmet Nûrî YOLURî veradîyayîşê xo ra dima vato ke; ‘Ma berdê Qereqolê Jendermeyî, ma bi şewe oca de mendê û roja bîne serê sibayî ma ameyê veradayîş. Ma eskeran ra aqûbetê ê hîrê kesanê bînan zî persayê, la ma ra vatê, ma ê berdê eskerîyayê zereyê YÎBOyî.’

 

Keye û merdimanê Seyîthan, Servet û Îkramî, wina dewam kerdê; Ma, hêverî ê hîrê kesanê ke veradîyayê dir qisey kerdê û dima ra seba ke aqûbetê merdimanê xo bimusê ma bi ûsûlê nuştekî muracaatê Fermandarîya Jendermeyê Qezayê Licêyî kerdê. La Fermandarîye, ma ra vat ‘Ma operasyonêko winasî nêkerdo û ma kes nêgirewto binçim’.

 

Badê cu ma pê hesîyayê ke eskerê Tûgayê Bolûyî ke ê tarîxan de a mintiqa de operasyon kerdo, ê eskeran Seyîthan, Servet û Îkram binçim kerdê. Ma muracaat bi kamcayî kerdo zî ma nêeşkayê çîyêk bimusê. Ma heta Fermandarîya Jendermeyî ya Ûmûmî zî müracaat kerd, la hewna zî ma nêeşkayê netîce bigîrê. A roje ra nat ma Îkram ÎPEK, Servet ÎPEK û Seyîthan YOLURî ra tu xebere nêgirewte. 

 

Nika zî ma semedê Îkram Îpek, Servet Îpek, Seyîthan Yolur û heme însanê ma yê ke binçiman de ameyê vîndîkerdiş yan zî bi cînayetanê sîyasîyan ke kerdoxî aşkere nîyê ameyê kiştiş, deqeyêk çalakîya roniştişî kenê.” 

 

Daxuyanî bi çalakiya rûniştinê bi dawî bû. 

 

ÊLIH 

 

Xizmên Windayan û rêveberên ÎHD’a Êlihê jî di hefteya 581’emîn de çalakiya “Bila winda bên dîtin û kujer bên darizandin” li ber Peykerê Mafên Mirovan ê li serê Cadeya Gulistanê li dar xistin. Gelek parêzer û xizmên windayan û parêzvanên mafên mirovan tev li çalakiyê bûn û wêneyên windayan hildan. Vê hefteyê li kujerên Husnu Kaçar, Halîl Erzen, Rafet Ozer û Abdulcelîl Kaçar ên di 17’ê gulana 1994’an de li Êlihê hatin qetilkirin, hat pirsîn. 

 

TÎMÊN TAYBET HER ÇAR GUNDIYAN QETIL DIKIN 

 

Rêveberê ÎHD’a Êlihê Ercan Başer serpêhatiya her çar welatiyên hatin qetilkirin xwend û wiha got: “Bavê Husnu Kaçar, Omer Kaçar wiha dibêje; Malbata Kaçar li gundê Kişlacik ê bi ser navenda Sêrtê ve dijî. Husnu Kaçar, Abdulcelîl Kaçar, Halîl Erzen û Rafet Ozer ên gundiyên hev ji bo hewcedariyên cejnê diçin navenda Sêrtê. Leşker her çar gundiyan bi rê ve disekinîne. Leşker her çar gundiyan dibe Newala Qesaban a bi ser navenda Sêrtê ve. Her çar gundiyan li Newala Qesaban ji aliyê Tîmên Tevgera Taybet ve tên kuştin. Tê gotin ku her çar gundî di şer de hatine kuştin. Cenazeyên her çar gundiyan diavêjin Newala Qesaban û sîlehan datînin ber wan. Dema malbat diçin ku cenazeyên xwe werbigirin, leşker dibêjin ‘ev terorîst in’ û cenazeyan nadin wan. Malbat dibêjin ku medya dewletê ya wê çaxê her çar gundiyan wek ‘terorîst’ nîşan didin û nûçeya wan serwîsî raya giştî dikin.” 

 

Daxuyanî piştî çalakiya rûniştinê bi dawî bû.