NAVENDA NÛÇEYAN - KCK’ê diyar kir ku dewleta tirk di êrişên xwe yên bi SÎHA’yan ên li dijî Herêma Federe ya Kurdistanê û Bakur û Rojhilatê Sûriyeyê de gelê kurd hedef digire û banga lidarxistina protestoyan li gelê kurd kir. 

 

Êrişên dewleta tirk ên li dijî Herêma Federe ya Kurdistanê, Şengal, Mexmûr û Bakur û Rojhilatê Sûriyeyê didomin. Li rexekî bi çekên kîmyewî êrişî herêmên Zap, Metîna û Avaşîn dike û li hêla din j3ı bi Balafirên Biçek û Bêmirov (SÎHA) êrişî Şengal û Mexmûrê dike. Di encama êrişên dewleta tirk ên ji sala 2015’an heta niha de herî kêm 150 sivîl hatin qetilkirin û herî dawî jî di encama êrişa bi SÎHA’yan a li dijî wesayîteke li navçeya Pêncwen a Silêmaniyeyê de 3 kes hatin qetilkirin. Koma Civakên Kurdistanê (KCK) bi daxuyaniyekê êrişên dewleta tirk ên li dijî qadên sivîlan şermezar kir û bang li hikûmetên Bexda û Hewlêrê kir ku li berpirsyartiya xwe rabin. Li gorî nûçeya Ajansa Nûçeyan a Firatê (ANF); KCK’ê bang li gelê kurd û dostên wan kir ku bêdengiya saziyên navneteweyî protesto bikin. 

 

ÊRIŞ ŞERMEZAR KIR 

 

Daxuyaniya Konseya Rêveber a KCK’ê wiha ye: “Piştî ku AKP-MHP jinûve bû desthilatdar, dewleta tirk a mêtinger qirker êrişên li ser gelê kurd û hêzên azadiyê hîn bêhtir zêde kir û di nava çend hefteyên dawî de hem li Rojava hem jî li başûrê Kurdistanê gelek mirovên me şehîd bûn. Em van êriş û komkujiyên dewleta tirk a mêtinger qirker bi tundî şermezar dikin. Ji malbatên kesên di êrişan de jiyana xwe ji dest dane û tevahiya gelê kurdistanê re sersaxiyê dixwazin.

 

BÊDENGIYA HEWLÊR Û BEXDAYÊ 

 

Li hemberî van êriş û komkujiyên dewleta tirk hin saziyên demokratîk û welatparêz nerazîbûnê nîşan didin, lê belê di serî de yên xwedî berpirsyarî, dewlet û saziyên navneteweyî li hemberî van êrişên dewleta tirk bêdeng in. Ev helwesta saziyên berpirsyar û dewletan nayê qebûlkirin. Dewleta tirk a mêtinger qirker bi têgihiştina xwe ya dijminatiya li kurdan qanûn û hiqûqê binpê dike û li her derê bênavber êriş dike û komkujiyan pêk tîne. Tenê vê hefteya dawî li başûrê Kurdistanê di êrişên bi balafirên keşfê de gelek mirovên me hatin qetilkirin. Lê belê ne hikûmeta başûrê Kurdistanê ne jî dewleta Iraqê li hemberî vê yekê nerazîbûnê nîşan didin. Di serî de hikûmeta başûrê Kurdistanê û dewleta Iraqê divê li ber van êrişan rabin û pêşî li êrişan bigirin. Bêdengî û xemsarî tê wateya hevkariya bi komkujî û êrişên dewleta tirk re. Ev rewş bi taybetî ji bo hikûmet û siyaseta başûrê Kurdistanê derbas dibe. Yên ku li hemberî qetilkirin, kuştina kurdan dengê xwe nakin, nerazîbûnê nîşan nadin, gelo çawa dikarin bibêjin ku ew kurd in û gelê kurd temsîl dikin? Ev helwest nayê qebûlkirin. Bi qasî hikûmeta başûrê Kurdistanê rêxistin û partiyên kurdan jî ji vê rewşê berpirsyar in û divê bikevin nava liv û tevgerê, helwestê nîşan bidin.

 

BANGA LI SAZIYÊN NAVNETEWEYÎ KIR

 

Dewlet û saziyên navneteweyî jî li hemberî van êrişên dewleta tirk a dagirker nerazîbûnê nîşan nadin. Dewleta tirk a mêtinger qirker di serî de li rojavayê Kurdistanê û başûrê Kurdistanê li her derê êriş dike, her roj kurdan qetil dike, lê ev dewletên navborî bi dewleta tirk re bi rengekî bêperwa têkiliyên li ser berjewendiyên aborî û siyasî datînin. Nêzîkatiyeke bi vî rengî ya li gelê kurd ne ya qebûlkirinê ye. Em careke din bang li van dewletan û saziyên navneteweyî dikin ku dest ji vê helwesta xwe berdin ku hebûn û nirxên gelê kurd ji nedîtî ve tên, nebin şirîkê êriş û komkujiyên dewleta tirk, li hemberî van kiryaran helwestê nîşan bidin.

 

BANGA PROTESTOYAN 

 

Dewleta tirk a mêtinger û qirker bi zanebûn û ji bo berevajîkirina rastiyan welê nîşan dide ku mîna ev êriş li dijî PKK'ê ne. Xayinên ku ji bo berjewendî û serwetê bi dewleta tirk re tevdigerin, bi nêzîkatiyeke bi vî rengî hewl didin xiyaneta xwe veşêrin. Êrişên dawî yên li başûrê Kurdistanê careke din raxist pêş çavan ku armanca dewleta tirk tunekirina hebûna kurdan e. Li hemberî vê yekê girîng e welatparêz, saziyên demokratîk, rewşenbîr û hunermendên kurd helwesteke xurt nîşan bidin, zexta siyasî li berpirsyaran bikin û wan neçar bihêlin ku berpirsyariyên xwe bi cih bînin. Gelê kurd û dostên wan jî divê li her derê nerzîbûna xwe nîşan bidin, bêdengiya dewlet û saziyên navneteweyî ya li hemberî êriş û komkujiyên dewleta tirk şermezar bikin û nîşan bidin ku nêzîkatiyeke bi vî rengî nayê qebûlkirin.”