ÎZMÎR - Dayika Sezer Alan ê ku li Girtîgeha Îdirê bi awayekî gumanbar jiyana xwe ji dest da Selma Karadereyê, behsa îşkenceyên li girtîgehê li kurê wê hatine kirin kir û got: “Ew xwe nakujin. Wan dikujin, didin kuştin û wekî xwe kuştibin nîşan didin." 

 

Girtîgeha Girtî ya Tîpa S a Îdirê ku tim bi binpêkirina mafan di rojevê de ye, bi mirinên bi guman di rojevê de ye. Girtiyên edlî Sezer Alan, Serkan Kaya, Ercan Çakar û Adnan Karayigît ku ji sala 2022’yan û vir ve di heman girtîgehê de ne, bi awayekî guman jiyana xwe ji dest dan. Hêjayî bibîrxistinê ye ku girtiyan piştî ji malbat û parêzerên xwe re qala îşkenceya ku gardiyan li girtîgehê li wan kirine kirin, bi awayekî guman jiyana xwe ji dest dan.

 

Herî dawî Adnan Karayigît ê li Girtîgeha Girtî ya Tîpa S a Îdirê di 28'ê Cotmehê de bi awayekî guman jiyana xwe ji dest da. Hat diyarkirin ku Karayigît ê 7 sal in girtî ye berê ji malbata xwe re gotibû, "Wê min li vir bikujin."

 

Selma Karadereyê ku di 20'ê Sibata 2022'yan de li Girtîgeha Îdirê bi kurê wê Sezer Alan di bin şert û mercên gumanbar de winda kir, li ser zêdebûna mirina bi guman a li heman girtîgehê axivî.

 

 

Dayik Selma Karadereyê diyar kir ku girtiyên edlî li Girtîgeha Îdirê bi zanebûn hatine qetilkirin. Karadereyê bi bîr xist ku kurê wê her tim ji aliyê gardiyanan ve rastî zextên derûnî û heqaretan hatiye û got ku piştî mirina bi guman a kurê wê, saziyên pêwendîdar ji bo ronîkirina bûyerê gav neavêtine.

 

'EV DER MAKÎNEYA ÎŞKENCEYÊ YE'

 

Karadereyê bilêv kir ku kurê wê beriya bimire telefonî wê kiriye û ragihandiye ku li girtîgehê lêgerîna tazî lê hatiye ferzkirin û got ku Alan jê re gotiye: "Ez nikarim lêgerîna tazî qebûl bikim." Karadereyê destnîşan kir ku lêgerîna tazî sûc e û got: “Lêgerîna tazî betal bikin. Mafê tu kesî tune ku bi namûs û serbilindiya kesekî din bilîze. Lêgerîna tazî bû sedema jiyana kurê min. Min hewl da ku dengê xwe bidim bihîstin lê min nekarî. Kurê min ji min re digot, 'Dayê, ev der ne girtîgeh e, wekî tu dizanî, ev makîneya îşkenceyê ye.' Sezer di telefonê de got, 'Eger tiştek bi min bê, doza mafên min bike.' Piştî axaftina bi wî re, roja din xebera mirina wî hat. Gardiyanan telefonî me kirin û gotin ‘serê we sax be' û telefonê girtin." 

 

Karadereyê anî ziman ku kurê wê xwe nekuştiye û got: “Tu delîlên mirina wî tune ne. Parêzeran destpêkê gelek hewl dan, lê doz hat girtin. Li ser awayê mirinê gumanên min ên mezin hene. Ez dixwazim sedema mirina kurê xwe bizanim. Bila dayik negirîn." 

 

'BILA BI DAWÎ BIBE'

 

Karadereyê got: “Bila hêsirên dayikan nebarin. Li girtiyên li girtîgehan binêrin û bipirsin 'pêdiviya wan çi ye?' Tê gotin ku wan xwe kuştiye. Na, xwe nekuştine. Ew tên kuştin, wan didin kuştin û wekî xwekuştibin nîşan didin. Divê em çavên xwe ji van mirinan re negirin. Divê em serî li cihên pêwîst bidin. Êdî divê li dijî kuştine ku wekî xwekuştinê tê nîşandan çareseriyek bê dîtin."