AMED - Nivîskar Sureyya Kacabey tev li Mihrîcana Şanoya Jin a Amedê bû û got ku divê tevgerên jinan amûrên pergala nêrza bi kar neyînin. 

 

Bi pêşengtiya Şanoya Bajar a Şaredariya Bajarê Mezin a Amedê, Şanoya Bajar a Amedê, Komeleya Çand Huner û Wêjeyê ya Jinan (KASED) û Organîzasyona ÎVA’yê di navbera 5-10’ê mijdarê de Mihrîcana Şanoya Jinan a Amedê tê lidarxistin. Şano, di roja duyemîn de didome. Di çarçoveya mihrîcanê de îro bi beşdariya nivîskar Sureyya Karacabey gotûbêja “Jin li şanoyê ne” hat lidarxistin. Gotûbêj, li Navenda Çand û Kongreyê ya Çand Amedê hat lidarxistin û gelek şanohez tev li bûn. 

 

Karacabey di gotûbêjê de got ku jin di her qadên jiyanê de têdikoşin û ev tişt anî ziman: “Tecrûbeyên jinan ên di şanoyê de pir ji zû ve ye. Lê belê forma şanoya jinan a esasî di destpêka salên 1970’î de dest pê kir. Nivîsên jinan divê her tim nûjen û baş bin. Ji ber ku ev yek tê wateya îtîraza li dijî formê jî. Dema tevgera jin hêviyeke rizgariyê pêşkeşî cîhanê dike; divê li dijî cîhana bi fikrên nêrza hatiye avakirin, amûrên wê pergala nêrza bi kar neyîne. Divê bi formeke cuda derkeve holê.” 

 

Di gotûbêjê de li ser lîstika ji hêla nivîskara lîstikan Şenay Tanrivermîş ve hatiye nivîsandin jî axaftin hatin kirin. Herî dawî jî plaket dane Sureyya Karacabey û gotûbêj bi dawî bû. 

 

Mihrîcan, bi atolyeya “Kargeha Vegotina Çîrokan” a li Navenda Çand û Kongreyê ya Çand Amedê û bi beşdariya derhêner Berfîn Zenderlîoglû didome.