Rojnameger Nazim Daştan û Cîhan Bîlgîn ku geşedanên li Bakur û Rojhilatê Sûriyê dişopandin, di 19’ê kanûnê de li ser rêya navbera Bendava Tişrîn û Bajarokê Sirrîn ji aliyê Balafirên Bêmirov ên Çekdar (SÎHA) ên Tirkiyeyê ve hatibûn qetilkirin. 

 

Rojnamegerên di saziyên çapemeniyê yên cuda yên Wanê de dixebitin, têkildarî qetilkirina 2 rojnamegeran û zextên dawî nirxandin kirin.

 

 

Nûçegihana JINNEWS'ê Rabîa Onver diyar kir ku bi salan e li hemberî Çapemeniya Azad zext û êrîş tên kirin û got ku wan têkoşîna xwe ya li hemberî vê yekê mezin kirine û bi ragihandina rastiyan re bersiva pêwîst dane. Rabîa Onver bertek nîşanî qetilkirina rojnamegerên ku bi armanca êrîşên li ser bajarên Bakur û Rojhilatê Sûriyeyê ji raya giştî re ragihandine da û wiha axivî: “Hevalên me yên rojnameger Nazim Daştan û Cîhan Bîlgîn ji ber ku rastî nivîsandin bûn hedef û hatin qetilkirin. Kuştin, binçavkirin, îşkence û girtin nikarin paşde gav bidin avêtin. Têkoşîna me bi têkoşîna Nazim û Cîhanê ya heqîqetê mezin dibe. Piştî her êrîşekê em zêdetir bi pîşeya xwe ve girêdayî dibin. Weke xebatkarên Çapemeniya Azad em ê têkoşîna xwe li her derê bidomînin.”

 

‘EM Ê RASTIYAN AŞKERA BIKIN’

 

 

Rojnameger Oktay Candemîr da zanîn ku hemû hevrêyên wî yên hatine qetilkirin wê têkoşîna xwe bidomînin û rojnamegerên li Rojava û Başûr hatin qetilkirin di çarçoveya cînayetên kiryar nediyar de hatin hiştin. Candemîr anî ziman ku di salên 90'î de li ser sînorên Tirkiyeyê rojnameger hatin qetilkirin, lê îro ev mirin ji sînoran derbas bûne û got, "Di çalakî û çalakiyên bi armanca qetilkirina rojnamegeran de xebatkarên çapemeniyê tên binçavkirin û girtin.”

 

Candemîr anî ziman ku ji aliyekî ve behsa aştiyê dikin û ji aliyê din ve qetilkirina sivîl û rojnamegeran nakokî ye û wiha axivî: “Em nikarin bi vî rengî behsa aştiyê bikin. Weke Çapemeniya Azad em ê rastiyan derxin holê. Em ê mîrateya ku wan li pey xwe hiştine bigirin û xebatên wan ên neqediyayî biqedînin. Em ê alên hevalên xwe yên hatin qetilkirin û hatin girtin ji cihê ku lê hiştin hildin û têkoşîna wan bidomînin."

 

‘TIRKIYE JI BO ROJNAMEGERA BÛYE DOJEH’

 

 

Rojnameger Ruşen Takva diyar kir ku dema li Tirkiyeyê dixebitî bûn şahidê qetilkirina rojnamegeran û divê ji asta herî jor bertek bên nîşandan. Takva anî ziman ku ew qetilkirina rojnamegerekê weke êrîşekê li ser hemû çapemeniyê dibînin û wiha got: “Ji ber ku êrîş li dijî mafê raya giştî ya girtina agahiyan e. Rojnamegerên ku bertek nîşanî kuştina hevpîşeyên xwe didin, tên binçavkirin û girtin, ev rewşeke tirsnak e. Hûn nikarin li tu welatên cîhanê helwesteke wiha bibînin. Çavê hemû cîhanê bi taybetî jî Tirkiye li geşedanên li Sûriyeyê ye. Her kes li bendê ye ku nûçeyên rast ji wir werin. Em rojnamegerên li Tirkiyeyê dixebitin herî zêde li bendê ne ku geşedanên li vir ji raya giştî re ragihînin. Lê mixabin ev rewş li Tirkiyeyê tam berovajî ye. Li Tirkiyeyê bi taybetî li Wanê zexteke mezin li ser rojnamegeran heye. Tirkiye ji bo rojnamegeran bûye dojeh.”

 

‘EM PAŞVE GAV NAVÊJIN’

 

Takva diyar kir ku ew ê pênûsa hevrêyên xwe yên hatine qetilkirin li erdê nehêlin û wiha pê de çû: “Tevî zext û binçavkirinan jî em ê têkoşîna xwe bidomînin û agahiyên rast ji raya giştî re ragihînin. Hikûmet ji bêdengiya saziyên navneteweyî ya li hemberî zextên li ser çapemeniya kurd sûd werdigire. Li gel salên binçavkirin, girtin û zextan jî tu kesî ji me gav paşde neavêt. Me bi zelalî ragihand ku em bi kuştin, binçavkirin û girtinan paşde gav navêjin û dest ji nivîsandina heqîqetê bernadin. "

 

LI SÛRIYEYÊ 756 ROJNAMEGER HATIN QETILKIRIN

 

 

Rojnameger Arîf Aslan bibîrxist ku ji sala 2011’an heta niha li Sûriyeyê 756 rojnameger hatine qetilkirin, êrîşên li hemberî xebatkarên çapemeniyê nayên qebûlkirin û got ku erka xebatkarên çapemeniyê ew e ku bi kamera û pênûsan rastiyan derxînin holê. 

Aslan anî ziman ku vegotina rastiyan nabe sedem ku bibe hedefa êrîşan û wiha got: “Hêzên li Rojhilata Navîn dixwazin her tişt li gorî fikrên wan pêk were. Encam çi dibe bila bibe em ê weke xebatkarên çapemeniyê mafên rojnamegeran biparêzin. Pêdivî ye ku em têbikoşin da ku rojnameger li van xakan fikr û rastiyên xwe bi serbestî binivîsin."

 

Rojnameger Aslan diyar kir ku raya giştî û saziyên çapemeniyê yên navneteweyî bertekên têrker nîşan  nadin û wiha axivî: “Rêxistinên çapemeniyê yên navneteweyî bi taybetî dema ku mijar çapemeniya kurd be, bêdeng dimînin. Weke rojnamegerên kurd tevî hemû zehmetiyan em ê pîşeya xwe bidomînin. Em ê li hemberî hemû êrîşan rastiyan nîşanî cîhanê bidin û rastiyê binivîsin.”