Tecrîda li ser Rêberê PKK'ê Abdullah Ocalan ku li Girtîgeha Girtî ya Tîpa F ya Ewlekariya Bilind a Îmraliyê tê girtin, didome. Abdullah Ocalan ku destûr nehat dayîn bi malbat û parêzerên xwe re hevdîtinê pêk bîne, di 28'ê Kanûnê de bi heyeta DEM Partiyê re hevdîtin pêk anîbû. Heyetê bi armanca civakîkirina "çareseriyê" peyama Abdullah Ocalan a ji 7 xalan pêk hatî bi raya giştî re parve kir. 

 

Berdevkê Partiya Komunîst a Kurdistanê (KKP) Yasîn Yetişgen gengeşeyên didomin nirxandin û diyar kir ku ji bo tevkarî li pêvajoyê bibe divê Abdullah Ocalan bi temamî azad bibe.

 

‘DIVÊ ABDULLAH OCALAN AZAD BIBE'

 

Yetişgen anî ziman ku ew wekî partî destpêkirina hevdîtina bi Abdullah Ocalan re erênî dibînin û got: “Her wiha divê tecrîd bi temamî were rakirin û rê li pêşiya hevdîtina bi parêzer û malbatê were vekirin. Ji bo ku bi awayekî baştir tevkariyê li pêvajoyê bike divê bi tevahî Abdullah Ocalan azad bibe. Ji aliyê din ve em hêvîdar in ku ev hevdîtin bibe sedema xurtkirina atmosfera aştiyê, parastin û pêşxistina mafên gelê me û çareseriya pirsgirêka kurd li ser bingeheke demokratîk a aştiyane."

 

‘DIVÊ HAYA ME JI MANÎPULASYONAN HEBE'

 

Yetişgen bal kişand ser girîngî û lezgîniya danezana Îmraliyê ya ji 7 xalan pêk tê û got: "Li aliyekî em bi rastiyeke giştî ya ku 100 sal in bi tevahî tê înkarkirin û paşguhkirin re rû bi rû ne. Li aliyê din em bi gelên din ên herêmê re rû bi rû ne ku di encama vê pêvajoya înkarê de ji azadî û demokrasiyê bêpar mane. Ji ber vê yekê, çareseriya pirsgirêka ku jê re tê gotin 'pirsgirêka kurd', lê di esasê xwe de pirsgirêka Kurd/Kurdistanê bi rêyên demokratîk û aştiyane, wê bibe sedema aramiya gelên Rojhilata Navîn û herêmê yên ku 100 sal in di nava şer û pevçûnan de ne. Her wiha ev demeke dirêj e ku ji bo dewleta tirk rewş nebaş e. Ger tişt ji bo dewleta tirk baş biçûya, ne Bahçelî û ne jî Erdoganê ku li pişt wî sekinîbû, teqez dê pêvajoyeke nû nedana destpêkirin. Pratîka Tifaqa Gel a piştî sala 2015'an hat avakirin jî di vî warî de diyar dibe. Ji ber vê yekê divê em baldar bin li ser manîpulasyonên ku desthilat wan biafirîne." 

 

Yetîşgen destnîşan kir ku biratî û weltîbûneke wekhev a di navbera tirk û kurdan de pêkan e, lê divê ev wekî berê bi têgehên razber nebe. Yetîşgen got: "Tekane rêya biratiya kurd û tirkan ew e ku bi qanûnê bê misgoerkirin." 

 

‘DIVÊ MECLIS ÇARESERIYÊ HILBERÎNE'

 

Yetîşgen bal kişand ser îşareta Abdullah Ocalan ku ji bo çareseriya pirsgirêka kurd îşaret bi bi Meclisê kiribû û got ku divê paşeroj, îro û siberoja meseleya kurd û Kurdistanê bi tevahî li Meclisê bên gengeşekirin û çareserî bi afirandin. 

 

Her wiha Yetîşgen destnîşan kir ku divê statuya Rojavayê jî bê naskirin û bi vî awayî tevkarî li biratiya kurd û tirkan bê kirin. 

 

Yetîşgen di dawiya axaftina xwe de bal kişand ser yekîtiya neteweyî û got: "Divê hemû rengên siyasî yên kurdistanî li her derî di warê yekîtiya neteweyî de gav bavêjin ku em karibin sedsala 21'emîn bikin sedsala kurdan û Kurdistanê." 

 

MA / Mujdat Can