Bi daxwaza naskirina statûya Rêveberiya Xweser a Bakur û Rojhilatê Sûriyeyê, li Amedê deklarasyona “Ji Rojava re statû, ji bo gelan azadî” hate weşandin. Nûnerên partiyên siyasî û rêxistinên civaka sivîl di daxuyaniyê de axivîn. 

 

Ji ewil Hevserokê Giştî yê Partiya Herêmên Demokratîk (DBP) Keskîn Bayindir axivî û wiha bal kişand ser salvegera rizgarkirina Kobanê: “Ev roja taybet li tevahiya gelê Kurd pîroz be. Gelê Kurd mîna azadiya Kobanê, divê serkeftinên din jî bi dest bixe. Dirûşma me; ji Rojava re statû, ji bo gelan azadî ye.” 

 

‘DIVÊ HER KES XWEDÎ LI MODÊLA ROJAVA DERKEVE’ 

 

Bayindir, diya kir ku Rojava dikare qedera Sûriyeyê diyar bike û got: “Netewedewlet li seranserî cîhanê di nava lêgerînekê de ne. Em dizanin ku modêla ku hemû gel bi hev re, azad bijîn modêla Rojava ye. Lewma em dibêjin divê teqez her kes xwedî li modêla Rojava derkeve û xwedî li statûya Rojava derkeve. Tevî hemû zehmetiyan jî modêla Rojava ev 13 sal in xwe li ser pêyan digire. Divê her kes biparêze û li seranserî Rojhilata Navîn bikeve meriyetê.” 

 

‘DIJMINATIYA MODÊLA ROJAVA NEKIN’ 

 

Bayindir, got ku xelkê sivîl ê li Tişrînê ku statû û xaka xwe diparêze bi awayekî hovane tê qetilkirin û ev tişt anî ziman: “Dixwazin berxwedana gel têk bibin. Divê Tirkiye dijminatiyê li modêl û statûya Rojava neke. Ev modêl ji bo tu aliyan gef nîne. Weke partiyên siyasî, sazî dezgehan em ji bo naskirina statûya Rojava bixebitin. Divê êrişên ser Rojava tavilê bên sekinandin. Tekane rêya naskirina statûya Rojava, çarserkirina pirsgirêka Kurd e. Divê dewleta Tirkiyeyê û AKP vê înkar neke. Banga me ji bo AKP'ê ye; dijminatiya modêla Rojava nekin. Birêz Ocalan di hevdîtinê got; ‘Pêvajoya em tê de ne firsendeke dîrokî ye.’ Ji bo çareseriya pirsgirêka Kurd ev girîng e. Çareseriya pirsgirêka Kurd, ji naskirina statûya Rojava derbas dibe. Em êdi rojên pêş de ji bo naskirina statûya Rojava bixebitin.” 

 

AY: ÊRIŞÊN SER ROJAVA NAYÊN QEBÛLKIRIN 

 

Li ser navê Kongreya Îslama Demokratîk (DÎK) jî Mehmet Emîn Ay axivî û geşedanên heyî şiband Kerbelayê. Ay, wiha got: “Şerê Yezîd û Huseyniyan li ber Çemê Firatê didome. Yêzîdên serdemê êrişî gelan dikin. Li rexa din jî berxwedana gel û baweriyan a bi pêşengtiya Kurdan heye. Divê ev êriş bên bidawîkirin. Çawa ku DAIŞ li Kobanê hate têkbirin, kesên van êrişan dikin jî dê bên têkbirin.” 

 

KAYA: GELÊ KURD SÛCDAR NÎNE

 

Serokê Giştî yê Partiya Însan û Azadiyê (PÎA) Ahmet Kaya jî xwest pirsgirêk li ser maseyê bên çareserkirin û got: “Pirsgirêk bi zordestiyê çareser nabein. Ji bo çareseriya pirsgirêka Kurd hevdîtin hene, tişta pêwîst bikin. Gelê Kurd sûcdar nîne. Sûcdar diyar in.” 

 

DANIŞ: KESEK NIKARE LI HEMBERÎ KURDAN LI BER XWE BIDE 

 

Cîgirê Serokê Partiya Komunist a Kurdistanê (KKP) Mûrat Daniş jî got ku di dîrokê de Kurdan tu cara serî li ber dijminên xwe netewandine. Daniş, anî ziman ku nêzikatiya li dijî Rojava çi be dê ya li dijî Bakur jî ew be û got: “Divê gelê Kurd yekitiya xwe ava bike. Li hemberî Kurdên aştiya xwe ya navxweyî pêk anî û yekitiya xwe ya neteweyî ava kirî, tu kes nikare li ber xwe bide. Roja wê ye ku her kes li gorî feraseta yekitiya neteweyî tevbigere.” 

 

YEGEN: STATÛYA ROJAVA DÊ BIBE AZADIYA KURDÊN KEDKAR 

 

Endamê MYK’A Partiya Kedê (EMEP) Umut Yegen jî destnîşan kir ku naskirina statûya Rojava dê her wiha bibe azadiya Kurdên kedkar. Yegen, ji bo naskirina statûya Rojava û pêşîlêgirtina êrişan, banga têkoşînê kir.