AMED - Nûnerên partiyên siyasî yên tev li Newroza Amedê bûn bal kişandin ser banga dîrokî û anîn ziman ku divê Abdullah Ocalan ji hêla fîzîkî ve azad bibe. 

 

Li Parka Newrozê ya navçeya Rezan a Amedê bi dirûşma "Rêbertiya Azad Civaka Demokratîk" Cejna Newrozê bi coşeke mezin tê pîrozkirin. Bi sedan nûnerên partiyên siyasî û rêxistinên civaka sivîl, akademîsyen, rojnameger-nivîskar weke mêvan li Newrozê hatibûn vexwendin û li platformê şahidiya Newroza Amedê ya dîrokî dikin. 

 

Nûnerên partiyên siyasî yên li platformê cih digirin têkildarî banga dîrokî ya Rêberê Gelê Kurd Abdullah Ocalan ku di 27’ê Sibatê de hatibû weşandin, axivîn. 

 

 

Serokê Giştî yê Partiya Kedê (EMEP) Seyît Aslan hêvî kir ku Newroz bibe wesîleya aştî, wekhevî û demokrasiyê. Aslan, wiha got: “Weke partî em bi sala ye bi têkoşîna wekhevî û azadiyê ya gelê Kurd re bûn û em bi hev re têkoşiyan. Em dixwazin Newroza Amedê bibe wesîleya civakîbûna deklarasyona 27’ê Sibatê, bibe wesîleya aştî, wekhevî, rakirina tecrîdê, bêdengkirina çekan, bidawîkirina opeasyonan û bibe wesîleya berdana girtiyên siyasî. Vê xakê gelek êş kişand û gelek xwîn li ser hate rijandin. Lewma em di Newroza Amedê de dibêjin; bila ev xwîn êdî bisekine û aştî û xwişk-biratî çêbibe.” 

 

'DIVÊ ÎKTÎDAR BERSIVÊ BIDE BANGÊ’

 

Aslan, bi domdarî got ku ew banga Abdullah Ocalan gelek girîng dibînin û ev tişt anî ziman: “Zemîna çawaniya çareseriyê, demokratîkbûnê, bêdengkirina çekan û nîqaşên demokratîk ava kir. Divê îktîdar û dewlet bi lez û bersivê bide vê bangê. Di serî de îktîdar û serokkomar, hewceye hemû partiyên siyasî, rêxistinên pîşeyî û saziyên demokratîk berpirsyartiyê li xwe bigirin û xwedî li pêvajoyê derkevin.” 

 

'EM JI BO NEWROZA DÎROKÎ LI VIR IN’

 

 

Hevserokê Partiya Jinûveavakirina Sosyalîst (SYKP) Mertcan Tîtîz jî wiha got: “Em ji bo Newroza dîrokî li vir in. Bi milyonan kes dê îro li vir ji dil û can bersivê bide Banga Aştî û Civaka Demokratîk a birêz Ocalan. Dê vê helwesta xwe nîşanî hemû dinyayê bidin. Weke SYKP’ê em serfiraz in ku parçeyeke vê ne. Banga birêz Ocalan hem li welat hem jî li herêmê û cîhanê enerjiyek derxist holê. Lê hêj jî dewletê gaveke şênber neavêtiye. Divê beriya her tiştekî birêz Ocalan bi awayekî çalak beşdarî pêvajoyê bibe û ji bo vê jî divê şert û mercên wî bên başkirin. Divê ji hêla fîzîkî ve azad bibe. Gelê Kurd ji bo aştiyê amade ne. Divê dewlet demildest gavan biavêje.” 

 

'JI BO YEKITIYA TIRKIYEYÊ EV BANG GIRÎNG E’ 

 

 

Endamê Lijneya Rêveber a Partiya Gelecekê Aydin Altaç jî Newroz pîroz kir û hêvî kir ku bibe wesîleya aştî û aramiyê. Altaç, anî ziman ku banga Abdullah Ocalan ji bo aramî û yekitiya Tirkiye û herêmê girîng e û wiha got: “Hêviya me ew e ku ev bang cihê xwe bigire û aramî bê herêmê. Ji bo vê jî divê dewlet ji hêla qanûn û makezagonê ve gavan biavêje. Rola rêxistinên civaka sivîl a di vê pêvajoyê de girîng e. Weke partiyên siyasî û rêxistinên civaka sivîl em ê bibin alîkar.” 

 

'MISOGERIYA NASNAMEYA KURD DESTKEFTÎ NE’ 

 

 

Serokê Partiya Saadetê Abdurrahman Ergîn jî hêvî kir ku Newroz bibe wesîleya aştî û xwişk û biratiyê û got: “Di esasê xwe de li Amedê Newroz qada daxwaza aştiyê ya gel e. Meseleya herî girîng a Tirkiyeyê meseleya Kurd e û divê were çareserkirin. Dema ev meseleye hate çareserkirin dê aştî û aramî çêbibe. Ji ber şer gelek windahiyên aborî çêbûn. Bi çareseriya vê meseleyê re dê çek neyên bikaranîn, şer tune be, pêşiya siyasetê were vekirin û daxwazên gelê Kurd bên cîbicîkirin. Em dixwazin neheqiya heyî ji holê were rakirin. Mirovên me dixwazin xwe di destûra bingehîn de bibînin. Divê nasnameya Kurd di destûra bingehînd e bê misogerkirin, ji bo zimanê Kurdî di nava civakê de zêde bibe divê pêşiiya wê were vekirin. Ev ji bo Tirkiyeyê jî destkeftî ye. Em dixwazin pêşiya vê were vekirin.” 

 

MA / Rûkiye Payîz Adiguzel