Mamoste Sîbel Suna di dema protestokirina tayînkirina qeyûman a li Şaredariya Bajarê Mezin a Mêrdînê û şaredariyên Êlih û Xelfetî ya Rihayê de hate binçavkirin û tundî lê hate kirin. Di dema protestoyên li Êlihê de bi gotina; “Heke hûn bêdeng bimînin wê demê hûn şeytanên bêziman in, madem dê we qeyûm tayîn bikira wê demê we çima hilbijartin kir?” bûbû rojev. Sîbel Suna, hate binçavkirin, 2 rojan binçavkirî ma û dema hatî berdan jî dîsa tev li çalakiyan bû. Walîtiya Êlihê jî ji “Navenda Perwerdeya Taybet û Rehabîlîtasyonê” re nivîsa dûrxistina ji kar şand. Destûr nehat dayin mamoste Sîbel Suna xatirê ji xwendekarên xwe bixwaze û di 26’ê Mijdarê de ji peywirê hate dûrxistin. 

 

'EZ POŞMAN NÎNIM’

 

Sîbel Suna bertek nîşanî dûrxistina ji peywirê da ku ji sala 2014’an dike û wiha got: “Bajarê me niha di rewşeke xerab de ye. Ez mamoste me û li gorî min divê tiştên biêş bên vegotin. Ez nikarim hinek tiştan daqurtînim. Ez ji ber tu tiştekî poşman nînim. Ji ber ku min bi zelalî vegot. Roja qeyûm hatî tayînkirin, ez li hêla şaredariyê dimeşiyam. Dema di meşiyam min dît ku qeyûm tê. Min jî berteka xwe nîşan da. Dema min bertek nîşan dayî hatim binçavkirin. Ez piştgiriyê nadim qeyûm û dê nedim jî. Ji ber ku tiştên di dema qeyûm de hatin kirin zilm bûn û ez nikarim piştgiriyê bidim wê zilmê.” 

 

Bi domdarî Sîbel Suna anî ziman ku piştî mafê bijartin û hilbijartinê, niha jî mafê wê yê mamostetiyê hatiye xespkirin û ev tişt anî ziman: “Bêyî ku tiştek ji min re wer gotin, walîtiya Êlihê û midûrê dibistanê bi nivîskî axivîne. Ji bo xelasbûna rojê 5 deqe mabûn ku bi lev û bez gazî min kirin. Min jî got; ‘gelo tiştek bû?’ Ji ber ku derxistina ji dersê karektera midûr nebû. Bi telefonê geriya û got; ‘Rewşekî lezgîn heye.’ Min got; ‘çi bûye?’ Got; ‘Walîtiyê biryar daye.’ Got; ‘Mamoste tu ji peywirê hatiyî dûrxistin.’ Ez jî wê demê hîn bûm.” 

 

NEHIŞTIN XATIRÊ JI XWENDEKARÊN XWE BIXWAZE 

 

Sîbel Suna got ku qeyûm Ekrem Canalp ferman daye ku nehêlin ew xatirê ji xwendekarên xwe bixwaze û wiha pê de çû: “Ser re zext kirine û gotine; ‘nehêlin xatirê ji xwendekarên xwe bixwaze.’ Tu çawa dikarî vê bêrehmiyê bikî, ma zarokên te tune ne, ma qet hezkirina zarokan di dilê te de tune ye? Tişta tu dikî tiştekî nebaş e, dayikên zarokan, bavên wan li ser Whatsappê bi dîmen li min geriyan û digiriyan. Hûn nikarin vê bi min bikin. Mafên min hene. Birêz walî ji te re dibêjim; tu niha walî yî lê kursiya te jî diheje. Ez ji tu tiştên min gotin poşman nînim. Tu nikarî min bi pîşeya min bitirsînî.” 

 

GEFA DERXISTINA JI PÎŞEYÊ

 

Mamoste Sîbel Suna destnîşan kir ku qeyûm gefa derxistina wê ya ji pîşeyê li wê dixwe û wiha dirêjî da axaftina xwe: “Îcar gotiye; ‘bila duayan bike ku min ew ji pîşeyê dernexistiye.’ Tu kî yî, kî vê rayeyê dide te? Em li ser vê xakê ji dayik bûne, mezin bûne. Tu kî yî? Tu bi xêra bajarê min nanê xwe dixwî. Hewce bike dê ji vir biçî. Bi vê gef li min xwariye. Lê vê ji bîr neke, tu mecbûrî hemû mafên min di çarçoveya hiqûqê de bidî min.” 

 

Sîbel Suna, da zanîn ku di dema binçavkirinê de ji bo rapora derbkirinê teklîf jê re hatiye kirin û wiha got: “Karên xwe yên qirêjî bi min nedin paqijkirin. Tundî li min kirin. Gotin; ‘wê raporê ji holê rake.’ Ma ez çima gilî nekim? Waliyê qeyûm li avahiya şaredariyê hemû perdeyan digire û mîna tirsonekan çaya xwe vedixwe. Heke tu tirsonek nebûya dê te dema her kes radiza ew der xesp nekira. Belkî piştî vê hevpeyvînê bên malê û min binçav bikin. Dê bike, ji ber ku ev yek kiriye. Ez bi zimanê herî hêsan bibêjim; ev ew şexsiyete ku zarokê 16 salî yê hevala min a kuafor ji nav nivînan derxistî û xistî girtîgehê ye. 16 salî ye, anku zarok e, hêj balix e. Niha di Girtîgeha Amedê de ye. Tişta tu dikî tiştekî xelet e, wan destên xwe yên qirêjî ser zarokan bikişîne.” 

 

‘JI BO BÊHTIR BIDIZE BÊHTIR KURSÎ LAZIM IN’ 

 

Sîbel Suna bal kişand ser nelirêtiyên qeyûm û axaftina xwe wiha qedand: “Ji bo bêhtir bidizin bêhtir kursî lazim in. 3 milyar lîre deynê şaredariyê hene. Ew pere li ku ye, projeyên te li ku ne? Tenê nav û wêne hene. Çi dibe bila bibe, çiqas bi ser min de bên jî weke keseka xwedî wijdan ez ê bêdeng nemînim. Qeyûm, îradeya me xesp kir. Bêguman em ê li dijî vê bisekinin.” 

 

MA / Fethî Balaman