Êrişên dewleta tirk û komên paramîlîter ên SMO’yê yên li dijî Bakur û Rojhilatê Sûriyeyê berdewam in. Fermandariya Giştî ya Hêzên Meclisa Leşkerî ya Minbicê der barê têkbirina êrişên dewleta tirk û komên wê yên paramîlîter ên SMO’yê yên li ser bendava Tişrînê û pira Qereqozaqê daxuyaniyeke nivîskî da. 

 

Li gorî nûçeya ANHA’yê; Fermandariyê diyar kir ku hêzên wan li dijî êrişên ser Bendava Tişrînê û Pira Qereqazaqê berxwedaneke mezin dimeşînin û wiha got: “Hêzên me piştî 3 rojan, êrişên dijwar têk birin û kirin ku çete neçar bimînin birevin.”

 

Bi domdarî hate diyarkirin ku tevî lihevkirina agirbestê ya bi navbeynkariya DYA’yê jî dewleta tirk û komên paramîlîter bi dehan caran bi çekên giran êriş birine ser hêzên wan û wiha hate gotin: “Zêdetirî 20 balafirên bêmirov ên Tirkiyeyê yên ji cureya Akinci êrişî pira Qereqozaqê û bendava Tişrînê ya li başûrê rojhilatê Minbicê kirin. Di navbera hêzên me û çeteyan de êrişên dijwar derketin.

 

GELEK SERÇETE HATIN KUŞTIN

 

Dewleta Tirk a dagirker a ku bi hewayî piştgiriyê dide çeteyan, bi balafirên bêmirov bendava Tişrînê bombebaran kir. Di encamê de zirareke mezin gihand bendavê. Her wiha herêmên pevçûnên hêzên me û nuqteyên hêzên me bi zêdetirî 160 caran bi balafirên bêmirov bombebaran kirin. Bi vê yekê dewleta Tirk hewl da berxwedana hêzên me asteng bike lê şervanên me bi taktîkên şerê nû derbên giran li çeteyan dan, kemîn ji wan re danîn û gelek çete tevî serçeteyan kuştin, tank û alavên wan ên leşkerî rûxandin.

 

BI BERXWEDANA HÊZÊN ME ÊRIŞ HATE TÊKBIRIN

 

Bi ruhê înîsiyatîf û berxwedana dîrokî, şervanên me bi pêşengiya YPJ’ê sing bi sing li hemberî bi dehan çeteyan şer kir. Di encama berxwedana hêzên me de hewldana kontrolkirina çeteyan ji pira Qereqozaq û bendava Tişrînê re têk çû. Şervanên me planên wan ên qirêjî yên dizîn û talankirina mal û milkên gelê Sûriyeyê têk birin. Bi wê re plana dewleta Tirk a dagirker a kontrolkirina bendavê û bikaranîna wê wek belgeyeke şantajkirinê li dijî gelê me li tevahî herêmên Sûriyeyê têk çû.”

 

BÎLANÇOYA ŞER Û PEVÇÛNAN

 

Di berdewamê de Meclisa Leşkerî bîlançoya şerê 3 rojan a li Pira Qereqozaqêû Bendava Tişrînê eşkere kir û ev daneye parve kir: “Di pevçûnan de 142 çete li Bendava Tişrînê, 68 çete li Pira Qereqozaqê û tevî 13 serçeteyan bi giştî 210 çete hatin kuştin. Bi sedan çete birîndar bûn. Di pevçûnan de 28 wesayît li Bendava Tişrînê û 11 li Pira Qereqozaqê bi giştî 39 wesayîtên leşkerî hatin rûxandin. Hêzên me 2 tankên dewleta tirk li Bendava Tişrînê û 4 li Pira Qereqozaqê bi giştî 6 tank rûxandin. Hêzên me 5 balafirên xwekuj xistin. Di pevçûnan de li Bendava Tişrînê 20 motorsîklêtên çeteyan hatin rûxandin.”

 

8 ŞERVANAN JIYANA XWE JI DEST DAN

 

Fermandariya Giştî ya Hêzên Meclisa Leşkerî ya Minbicê da zanîn ku di pevçûnan de 8 şervanên wan jiyana xwe ji dest dane û 13 jî birîndar bûn.