NAVENDA NÛÇEYAN - Partiya Çepên Kesk li gelek bajaran xebata hilbijartinê berdewam kir. Li navçeya Menemena Îzmîrê vekirina buroya hilbijartinê veguherî mitîngê û meşek girseyî hat lidarxistin. 

 

Partiya Çepên Kesk di çarçoveya hilbijartinên 14’ê Gulanê de xebatên xwe li gelek bajaran berdewam kir. 

 

ÎZMÎR

 

 

Partiya Çepên Kesk li navçeya Menemenê ya Îzmîrê buroya hilbijartinê vekir. Vekirina buroyê ewilî li taxa Ûgûr Mûmcû hat vekirin. Namzetên parlamenteriyê yên Partiya Çepên Kesk ên Îzmîrê û rêveberên HDP, Partiya Çepên Kesk û bi sedan welatî tev li şahiya vekirina buroyê bûn. Girseyê bênavber dirûşm berz kirin. 

 

 

Namzeta Partiya Çepên Kesk a Îzmîrê Canan Kebenç Ozkan di vekirina buroyê de axivî û da zanîn ku ev cejn wê bibe cejna hilweşandina îktidarê û wiha got: “Ev zilma 20 salî wê bi dawî bibe. Tişta ku rejîma yekeperest anî serê me li ber çavan e. Herî dawî me di hilbijartinê de dît ku vê îktidarê çi anî serê me. Ev ne qedera me ye. Kuştina jinan û cînayetên kar ne qedera me ye. Jiyanek bi rûmet, azad û wekhev mafê me hemûyan e. Kurd, jin û kedkar di sedsala ewil a komarê de bi zilm û kuştinê re rûbirû man. Lê ew ev sedsala duyemîn bibe sedsala komarek azad, wekhev û adil.” 

 

MEŞA GIRSEYΠ

 

 

Girse piştî vekirina buroya li Taxa Ûgûr Mûmcû, ji bo vekirina buroya hilbijartinê ya li taxa Mermerlî dest bi meşê kir û heta ber buroyê meşiya. Di meşê de dirûşm hatin berzkirin. Seranserî meşê xelkê eleqe nîşanî girseyê da. 

 

Meş li ber buroya Mermerliyê bi dawî bû. Hevserokê HDP’a Îzmîrê Çinar Altan di vekirina buroyê de axivî û diyar kir ku girseyê îro nîşan da ku ev girse di eywanan de bicih nabe û heta ev kolan azad bibin ew ê têkoşîna xwe bi biryarî bidomînin. 

 

AMED

 

Namzetên parlamenteriyê yên Partiya Çepên Kesk ên Amedê li gundên navçeyên Sûri Peyas, Rezan û Bajarê Nû serdana xelkê kirin û cejna xelkê pîroz kirin. Xelkê gundan şandeyan bi kêfxweşî pêşwazî kir û bi berzkirina dirûşmeyên “Jin jiyan azadî” û “Bijî Serok Apo” pêşwazî kirin. Namzetan li pirsgirêkên gundiyan guhdar kir. 

 

Namzet Adalet Kaya û Samed Menguç, Hevseroka HDP’a Amedê Gulistan Atasoy û rêveberên partiyê serdana gundên Saxdî, Zorava, Sadtî, Henîfî, Arzûlî yên Sûrê kirin. Namzet di serdana gundan de axivîn û diyar kirin ku ew ê dîrok û çarenûsa vê pergala 100 salî biguherînin. 

 

ŞIRNEX 

 

 

Li Şirnex û navçeyên wê jî amadekariyên ji bo mitînga jinan a dê sibê li Silopiya bê lidarxistin, berdewam dikin. Mitîng sibê li Qada Newrozê saet di 13.00’an de dest pê dike û Hevberdevka Partiya Çepên Kesk Çîgdem Kiliçgun Ûçar û Berdevka Meclisa Jinan a HDP’ê Ayşe Acar Başaran tev li mitîngê dibin. 

 

Bi armanca beşdariya mitîngê bi tevlibûna namzetên Şirnexê li taxa Başakê belavokên banga mitîngê hatin belavkirin. 

 

EDENE 

 

 

Namzetên parlamenteriyê yên Partiya Çepên Kesk ên Edeneyê li çar aliyên bajêr xebatên xwe yên hilbijartinê didomînin. Namzeta Partiya Çepên Kesk a Edeneyê Tulay Hatîmogûllari û şandeya pê re li taxa Bahçe ya bi ser navçeya Karataşa Edeneyê ve serdana mexdûrên erdhejê û dikandaran kirin. Hatîmogûllari li pirsgirêkên dikandaran û welatiyan guhdar kir û wiha got: "Em ê bi hev re birînên xwe bipêçin. Em ji ber doza girtinê ya HDP’ê bi Partiya Çepên Kesk diçin hilbijartinê. Em dixwazin hemû gelê me piştgiriyê bide Partiya Çepên Kesk.” 

 

ERDEXAN

 

 

Partiya Çepên Kesk di çarçoveya xebatên hilbijartinê de li Erdexanê civîna gel li dar xist. Ji bilî endam û rêveberên partiyê û namzetan Başak Demîrtaş jî beşdar bû. Başak Demîrtaş a di civînê de axivî, anî ziman ku wê heta hilbijartinê ji dil û can bixebitin û wiha got: “Em di 14’ê Gulanê de govenda serkeftinê bigerînin. Jin bi salan e eziyetê dikişînin lê partiya ku dengê jinan herî zêde lê xurt partiya me ye. Ez ji bo wekhevî, edalet û jiyaneke azad hemû jinên erdexanî vedixwînim partiya me. Dîsa hemû erdexaniyên li metropolan dijîn vedixwînim ku roja hilbijartinê bên bajarê xwe dengê xwe bi kar bînin.”

 

Demîrtaş ji bo şertên ku girtiyên siyasî bên berdan ava bibin bang li herkesê kir ku dengê xwe bidin Partiya Çepên Kesk û got: “An serkeftin an serkeftin.”

 

WAN  

 

 

 

Partiya Çepên Kesk li bajarên serhedê jî xebatên xwe bênavber didomîne. Li Wanê namzetên parlamaneteriyê yên Partiya Çepên Kesk û rêveberên bajêr li bajarokê Xoşebê yê navçeya Elbakê bi tevlibûneke zêde buroya hilbijartinê vekir. Dû re namzetên parlamenteriyê û şandeya pê re ji bo “Mitînga Jinan” a dê di 26’ê nîsanê de li navenda bajêr were lidarxistin belavok belav kirin. Şande pişt re çû navçeya Elbakê û serdana dikandaran kir. 

 

ÎDIR 

 

 

Tevgera Jinên Azad (TJA) di çarçoveya xebatên hilbijartinê de li Taxa Konakli ya Îdirê serdana gel kir. Aktivîstên TJA’yê kolan bi kolan mal bi mal geriyan û cejna gel pîroz kirin. Welatiyan jî bi coşeke mezin ew pêşwazî kirin. Aktivîstan belavok belav kirin û Partiya Çepên Kesk dan nasandin. Welatiyan jî destnîşan kirin ku çi dibe bila bibe wê doza gelan serbikeve û ji aktivîstên TJA’yê re xwestin.

 

Xebatên TJA’yê yên di çarçoveya hilbijartinê de didomin.

 

MÛŞ

 

 

Namzetên parlamenteriyê yên Partiya Çepên Kesk ên Mûşê ku xebatên xwe yên hilbijartinê bênavber didomîne, li navçe û gundan bi gel re civiyan û ji bo mitînga ku dê di 27’ê nîsanê de li navenda bajêr were lidarxistin bang kir. Ji namzetan Serhat Dûrsûn û Sumeyye Boz ên li gundan bi gel re civiyan ji bo mitîngê banga tevlibûnê kirin û xwestin ku gel li dora partiya wan bibe xelek. 

 

Sezaî Temellî jî bal kişand ku li bajêr dengek tenê jî nîne ku bidin desthilata AKP’ê û MHP’ê û anî ziman ku êdî gelê kurd û gelên Tirkiyeyê di ferqa her tiştî de ne. Temellî yê ji bo mitîngê banga tevlibûnê kir wiha axivî: “Li gelek bajarên Kurdistanê parlamenterê AKP’ê hatin hilbijartin. Belê em dizanin lê ev halê me çiye? Sedemê vî halê me kî ye? Desthilat e! Xizantiya li ser vê axa dewlemend ji ber vê desthilatê heye. Ciwanên Mûşê û herêmên din niha li rojavayê Tirkiyeyê ji bo pere qezenc bikin emeletiyê dikin. Ev ne mafê wan e. Em ê vê biguherînin.”

 

BÛRSA  

 

 

Partiya Çepên Kesk li Taxa Karadenîz a Înegolê buroya hilbijartinê vekir. Di vekirina ku gelek endamên partiyê tev li bûn de nava buroyê û kolana lê bi alên Partiya Çepên Kesk hate xemilandin. Di vekirina ku ciwanan eleqeyeke zêde nîşandan namzetên parlamenteriyê yên Partiya Çepên Kesk ên Bûrsayê Ceylan Erol Erdogan, Necdet Îpekyuz, Ayten Avdan, Bahar Toprak, Alî Sûngûr, Kemalettîn Yildiz, Kemal Dogan, Melek Yalçiner, Cahît Kirkazak û Hevberdevka Partiya Çepên Kesk Azra Gullupinar lê amade bûn. 

 

Namzetê parlamenteriyê Necdet Îpekyuz, bi lêv kir ku roj roja piştevaniyê ye û wiha got: “Em dixwazin dawî li qeyûm, tecrîdê binîn û pirsgirêkên ciwanan û jinan çareser bikin.” Îpekyuz, destnîşan kir ku şînkahiya li Bûrsayê bi “talanê” ji holê hatiye rakirin û wiha got: “Em ê şînkahiyê biafirînin. Em li ser navê Partiya Çepên Kesk peywîrdar in. Bûrsa wê bibe Partiya Çepên Kesk.”

 

Vekirina buroyê bi gerandina govendê û çepikan bi dawî bû. 

 

GUNDÊN AMEDÊ

 

 

Rêxistina Partiya Çepên Kesk a Amedê û namzetên parlamenteriyê yên Amedê, bi boneya Cejna Remezanê çûn serdana gundên navçeya Yenîşehîrê a Amedê û cejna gel pîroz kirin. Şandeya ku ji namzetên parlamenteriyê Sevîlay Çelenk û Mehmet Emîn Aktar û Hevserokê Partiya Demokratîk a Gelan (HDP) a Amedê Zeyyat Ceylan û rêveberên partiyê pêk dihat, serdana gundan kir.

 

Di rê de şandeyê welatiyan silav kir û cejna wan pîroz kir. Şande çû serdana gundên  Farê, Eynetiya Jêr û 450 Evlerê. Şande, li gundên navborî bi coşeke mezin hat pêşwazîkirin. Şêniyên gund ku bi alayên Partiya Çepên Kesk û yên Amedsporê, nameztan pêşwazî kirin û bi wan re wêne girtin. Gundiyan bi govendê, çepik, tililî û dirûşmeyên “Jin, jiyan, azadî” û “Bijî berxwedan” şandeyê pêşwazî kirin. 

 

'EV HILBIJARTIN JI BO ME DERFETEK E’

 

Di serdana gundê Farê de Hevserokê HDP’a Amedê Zeyyat Ceylan di destpêkê de cejna gundiyan pîroz kir û wiha got: “Bila bibe wesîleya azadî, aştî wekhevîyê. 23 roj ji hilbijartinê re maye. Em vê hilbijartinê ji bo vê erdnîgariyê pir girîng dibînin. Em ji bo bêedaletiya di warê çand, ziman û hunerî de girîng dibînin. Em ji bo bêedaletiya di warê aboriyê de girîng dibînin. Em ji bo zilma li ser kurd û Kurdîstanê girîng dibînin. Ji bo em bikaribim pêşî li van bigirin, ev hilbijartin ji bo me derfetek e. Yekîtiya me kurda, azadiya me ye. Yekîtiya kurda pêşîgirtina li zilmê ye, vekirina rêya azadiyê ye. Hikûmeta AKP-MHP radibe rûdinê li ser awayê êrişa li ser kurdan difikire. Em, wekî sîyaseta demokratîk çi dibe bila bibe, divê em di 14’ê Gulanê de cejna duyem diyarê gelê xwe bikin. Em nabêjin em ê piştî hilbijartinê cenetê bînin Kurdîstanê. Lê em ê karibin vê zilm û zora li ser gelê xwe bi dawî bikin. Bêhiqûqîtî û feqîriya li ser gelê xwe bi dawî bikin." 

 

'EM Ê HESABÊ TECRÎDÊ BIPIRSIN'

 

Paşê şande çûn gundên Eynetiya Kêr û 450 Evlerê. Namzetên Amedê li vir cejna gel pîroz kirin. Namzetan bal kişand ser girîngiya hilbijartina 14'ê Gulanê û îşaret bi tecrîda li ser Rêberê PKK'ê Abdullah Ocalan kirin. Di axaftinan de hat destnîşankirin ku ew ê hesabê tecrîda li ser Abdullah Ocalan bipirsin û wiha hat gotin: "Em ê hesabê zilm û zordariya li zindanan ji wan bipirsin." 

 

‘EM Ê HESABÊ TECRÎTÊ BIPIRSIN’

 

Li gundê Çarsedûpêncî pêşiya vekirina broya hilbijsrtêne axivî ûgot ku ji bo desthilatdark ji bo neçehilbijartinê çi ji destê  hat kiriye û wiha pê de çû: Xelazî tune, 21 rojek ji hilbijartinê re ma. Em ê hesab ji wan bipirsin. Em ê hesabê tecrîta lli ser birêz Abdullah Ocalan ji wan bipirsin. Em ê hesabê zilm û zordariya li zindanan ji wan bipirsin

 

Serdana gundan bi vekirina buroya hilbijartinê ya li 450 Evlerê bi dawî bû.