RIHA - Rêveberê Heyva Sora Kurd Ehmed Îbrahîm der barê êrişên li dijî sivîlên li bendava Tişrînê de axivî û diyar kir ku 3 xebatkarên tenduristiyê hatine kuştin û 5 ambûlans jî bûne hedef.
Êrişên dewleta tirk û komên wê yên paramîlîter ên bi navê Artêşa Neteweyî ya Sûriyeyê (ANS) yên li dijî Bendava Tişrînê didomin. Li ser banga Rêveberiya Xweser a Bakur û Rojhilatê Sûriyeyê, ji bo rawestandina êrişan û parastina Hêzên Sûriyeya Demokratîk (QSD) di 8’ê Çileyê de li Bendava Tişrînê nobed hat destpêkirin. Tevî nobedê jî êrişên Tirkiye û ANS'yê yên li ser herêmê dewam dikin. Herêm 11 caran ji aliyê SÎHA'yên tirk ve hat hedefgirtin.
Li gorî daneyên Desteya Tenduristiyê ya Rêveberiya Xweser a Bakur û Rojhilatê Sûriyeyê ji 8’ê Çileyê heta niha di êrişên li dijî gel û karwanên li Bendava Tişrînê de 21 welatiyên sivîl jiyana xwe ji dest dane û 203 welatî jî birîndar bûne.
Rêveberê Heyva Sor a Kurd Ehmed Îbrahîm diyar kir ku xebatkarên tenduristiyê yên ku beşek ji xelkê sivîl ên Tişrînê ne, dema ku karê xwe dikirin, gelek caran bûne hedef. Ehmed Îbrahîm diyar kir ku ev 14 sal in di Rêveberiya Xweser de şer diqewime û got: "Gelê li vir êş û zehmetiyên mezin kişandine. Niha jî êş û azarên wan didomin. Bi taybet êrişên dewleta tirk û çeteyên girêdayî wê bi salan e didomin. Di salên dawî de hedefa van êrişan bû Bendava Tişrînê. Ji roja ku şer dest pê kiriye heya niha kurd û erebên li Bakur û Rojhilatê Sûriyeyê dijîn, nerazîbûnên xwe tînin ziman."
SIVÎL HEDEF TÊN GIRTIN
Ehmed Îbrahîm bal kişand ser wê yekê ku gel ji bo rawestandina êrişan hatine Tişrînê û wiha got: “Ji 7 saliyan heta 70 saliyan bi sedan kes berê xwe didin Tişrînê û diqîrin ku ew êrişên Tirkiye û ANS'yê qebûl nakin. Lê em dibînin ku sivîl bin jî, dewleta tirk wan bi êrişên hewayî dike hedef. Bi dehan kes şehîd bûn û bi sedan kes jî birîndar bûn. Qebûlkirina vê ne mimkûn e. Êriş hê jî berdewam dikin. Di van êrişan de xebatkarên me yên tenduristiyê jî bûn hedef. Di van êrişan de hevalekî ku em pê re xebitîn şehîd bû."
BANGAWAZÎ
Ji aliyê din ve Ehmed Îbrahîm diyar kir ku di van êrişan de 3 xebatkarên tenduristiyê hatine kuştin û 3 jî birîndar bûne û diyar kir ku di êrişan de 5 ambûlans hatine hedefgirtin û 2 ji van ambulansan jî bi temamî nekarîne bên bikaranîn. Ehmed Îbrahîm got: "Li cîhanê mafê her kesî heye ku bigihêje tenduristiyê. Çi sivîl be, çi leşker be, mafê gihandina tenduristiyê di hemû qanûnên navneteweyî de hatiye garantîkirin. Lê belê Tirkiye bi tu awayî qebûl nake. Ne sivîl û ne jî pisporên tenduristiyê bang li hemû saziyên demokratîk û mafên mirovan dikin ku li dijî van êrişan dengê xwe bilind bikin. Ev êrîş sûc in."
MA / Ceylan Şahînlî