Di Newroza ku bi dirûşmeyên “Rebêrtiya Azad Civaka Demokratîk” û “Ji bo azadiyê civaka demokratîk" li navçeya Rezan a Amedê hat lidarxistinde bi sed hezaran welatî beşdar bûn. Di Newrozê de gel tenê peyamek da: azadiya fizîkî ya Rêberê Gelê Kurd Abdullah Ocalan. Ev peyam bi pankartên li qadê hatin vekirin, dirûşmeyên hatin berzkirin û afîşan hatin hilgirtin bi awayekî zelal derket holê.

 

Di Newroza Amedê de ku bi sed hezaran kes beşdar bûn, welatiyên ku em bi wan re axivîn, banga dîrokî ya Abdullah Ocalan nirxandin û azadiya wî ya fizîkî xwestin.

 

AZADÎ

 

Sultan Gulerê diyar kir ku ew bi hêviya aştiyê hatiye qada Newrozê û got: "Ya ku ez kêfxweş kirim, ev bû. Ez bawerim wê ev yek pêk were. Em ji girtiyan re azadiya fizîkî hêvî dikin. Divê dewlet gavên berbiçav bavêje. Bersiva vê jî, jixwe ev qadan in. Em li bendê ne ku gavên berbiçav bên avêtin."

 

Diyar Karataş anî ziman ku "Banga Aştî û Civaka Demokratîk" ya Abdullah Ocalan ew kêfxweş kirine û got: "Divê Abdullah Ocalan li Meclisê biaxive. Em dixwazin Abdullah Ocalan azad bibe."

 

Lahîve Arşîmenê jî diyar kir ku Abdullah Ocalan muzakere û aştiyê dixwaze û got: "Em jî piştgiriyê didin vê. Divê êdî dayik negirîn. Divê zincîrên hemû girtîgehan bên şikandin. Newroz pîroz be û aştiyê bîne."

 

‘DIVÊ ABDULLAH OCALAN DI NAVA GEL DE BE'

 

Îbrahîm Demîr diyar kir ku ji bo Newroza Amedê ji Îzmîrê hatiye û wiha got: "Ez hatim li ser xaka xwe Newrozê pîroz bikim. Abdullah Ocalan bang kir. Divê dewlet jî gavan biavêje. Heta îro bedelên mezin hatine dayîn. Serok bang kir, lê dewlet wê gavên çawa bavêje? Di qanûnên xwe de çi guhertin? Divê Rêberê Gelê Kurd Abdullah Ocalan azad bibe. Ev îş, bi dîmeneke li Îmraliyê nabe. Ji ber ku dewlet gavan navêje mirov bawer nakin. Divê Abdullah Ocalan û girtiyên siyasî yên din bên berdan. Aştî bi vî awayî nabe. Bi hezaran girtiyên me hene, bi deh hezaran gund hatin şewitandin. 5 milyon kurd koçî metrepolan kirin. Aborî hilweşiya. Her derê Kurdistanê şewitandin. Li gelek cihan ekolojiyê texrîb kirin." 

 

Melîha Kaplanê diyar kir ku ew jî wekî gelê kurd di bin zext û zordariyan de ne û bal kişand ser banga Abdullah Ocalan û got: "Dema em gavekê bavêjin, divê ew 10 gavan bavêjin. Bi anevêtina tu gavan me dixapînin. Em dixwazin zilm bi dawî bibe û li ser axa me azadî pêk were."

 

'COŞEKE MEZIN HEYE'

 

Delîl Akkurt ê astengdar ê ji Midyadê hat Newrozê anî ziman ku ew ji bo vê hestê bi zindî bibihîsin hatiye û got ku coşeke mezin heye. Akkurt got: "Berî her tiştî em Serok Apo bi rêzdarî silav dikin û Cejna Newrozê pîroz dikin. Em banga wî bi dil û can silav dikin û piştgirî didin. Qada Newrozê qada berxwedanê ya gelê kurd e. Em vê bangawaziyê bi rûmet dibînin. Em ê weki gelê kurd berpirsyariya xwe bi cih bînin. Daxwaza me ya gelê kurd di serî de azadiya Rêber Apo ye. Em dixwazin birêz Ocalan ji qada Newrozê fikirên xwe bi Kurdistanê û Rojhilata Navînê re parve bike." 

 

Muharrem Yildiz jî da zanîn ku ew vê bangê hembêz dikin û got: "Ev yek ji dil destê ber bi aştiyê ve ye. Niha zimanê aştiyê li Tirkiyeyê nîne. Pêkanîna antîdemokratîk nîşan dide ku niyeta wan a aştiyê nîne. Divê azadiya Abdullah Ocalan bê misogerkirin. Heya dawiyê baweriya me bi Abdullah Ocalan heye. Divê azadiya Ocalan bê misogerkirin."

 

Teyfik Karakaş got: "Berî her tiştî em vê pêvajoya aştiyê wekî pêngavekê dibînin. Pêvajo meseleyeke samîmî ye. Divê dewlet bi dilgermî nêzî vê pêvajoya ku birêz Abdullah Ocalan daye destpêkirin bibe. Devlet Bahçelî jî 'Mafê Hêviyê' anî ziman. Em hemû li bendê ne ku ev maf bikeve meriyetê."

 

Welatiyê bi navê Ferhat Fahrîoglû jî got: "Niha dor hatiye dewletê. Em ji aştiyê re amade ne. Em li bendê ne desthilat deriyê aştiyê veke."  

 

MA / Mujdat Can - Şîlan Şîrvan Çîl