Di operasyona li hemberî HDP'ê de 140 HDP'î hatin binçavkirin. Parlementerê HDP'ê Dr. Necdet Îpekyuz vê yekê nirxand û got: "Îktîdar nizane çi dike, nizane dê çi çawa bibêje, tenê li hêrsê siwar bûye." Îpekyuz, got tiştên kirin gel natepisîne, bereksê wê gel hêrstir dike.
Wekîlê Serokê Koma HDP'ê Ayhan Bîlgen, bertek nîşanî gotina Serokê AKP'ê Tayyip Erdogan a piştî hilbijartinan dê dîsa qeyûm tayîn bikin da û wiha got: “Gotinên Erdogan ên duh nenaskirina YSK û AYM'ê ye. Bi vê daxuyaniya Erdogan êdî AYM û YKS êdî bê wate bûne. Dixwazin bi rêbazên dijdemokratîk û dij hiqûqî serdestiya sindoqan bikin. Bi vê yekê hilbijartin, siyaset û demokrasî bê wate û qîmet dibe.
Hevserokê Giştî yê HDP’ê Sezaî Temellî, di Konferansa Meclîsa Ciwanên Marmarayê de axivî û wiha got: “Meşa Kurdan a li Rojhilata Navîn tenê bi daxwazên wan re ne sînordar e. Di cûntaya 12’e Îlonê de herî zêde dixwestin ciwanan ji siyasetê dûr bixin. Ji ber vê hemû rê û rêz pêk anîn.”
Hevseroka KCD û Parlamentera HDP’ê ya Colemêrgê Leyla Guven a 9 mehin li Girtîgeha Tîpa E a Amedê tê girtin, diyar kir ku dema berdana Parlameterê CHP’ê Enîz Berberoglu watedare û got: “Tu heviyên me ji AKP û daraza wê tuneye.”
Berdevkê HDP’ê Saruhan Oluç li dijî biryara der barê hevserokan wan a giştî Pervîn Buldan de hat dayîn nerazîbûn nîşan da û got: “Ev biryarek li dijî qanûn û makeqanûnê ye.”
Serokatiya Meclîsê pêşniyazpirsa Parlamentera HDP’ê ya Êlihê Feleknas Uca ya der barê pirsgirêka êzidiyên li kampan de qebûl nekir.
Wezîrê Karên Derve yê Iraqê Îbrahîm Ceferî, nerazîbûn nîşana hebûna artêşa Tirk a nava axa Iraqê da û diyar kir ku ew qebûl nakin artêşa Tirk di nava Iraqê de bimîne. Ceferî got: "Em destûr nadin Enqere mûdexeleya karên navxweyî yên Iraqê bike. Em qebûl nakin ku artêşa Tirk di nava axa Iraqê de bimîne."
Pisporê Rojhilata Navîn ê rojnameger Musa Ozugurlu diyar kir ku komên çekdar li gotina Tirkiye ya "Heta 15’ê cotmehê ji Idlibê derkevin" guhdar nakin.
Parlamenterê CHP’ê Sezgîn Tanrlikulu bertek nîşanî qedexekirina çalakiyên Dayikên Şemiyê û xizmên windayan da û got: “Xwendina çîrok û ango danezanê li meydanan hat qedexekirin, em ê êdî her hefte li Meclîsê bixwînin.”
Rêxistina HDP’ê li Amedê “Konferansa Hilbijartina Rêveberiya Herêmî" ku 2 rojan pêk bê li dar xist.
Hevşaredarê Tozanê yê DBP'î Mehmet Gultekîn ku qeyûm tayînî şûna wî hat kirin, anî ziman ku qeyûm perçeyek "Plana Rûxandinê" ne û got: "Bi qeyûman xwestin tevgera azadiyê tasfiye bikin." Her wiha Gultekîn got, dê gel şaredariyên xwe ji qeyûman bistîne.
Berdana Fadîle Halaç Cebael a bersûca doza komkujiya DAIŞ’ê ya li Dîlokê pêk hat û di komkujiyê de 56 kesan jiyana xwe ji dest dan, di rojeva Meclîsê deye. Fadîle bi hinceta pirsgirêkên tenduristiyê hatibû berdan.
Wekîla Serokên Koma HDP'ê Fatma Kurtulan, di sala nû ya meclîsê de axivî û xwest parlamentera HDP'ê ya Colemêrgê Leyla Guven bê berdan û meclîs ji vê şermê rizgar bibe.
Parlamentera HDP’ê ya Mêrdînê Pero Dundar guhertina navên kurdî yên 3 taxên navçeya Qoserê ji Wezîrê Karê Hundir Suleyman Soylu pirsî.
Dê serdema nû ya Meclîsê di 1'ê Cotmehê de dest pê bike. Di rojeva meclîsê de guherîna tuzuka hundur ku tezkereya operasyonên derveyî sînor, pêşnûmaya efûyê û sererastkirinên dengê muxalefetê bitepisîne tê de cih digirin heye.