MÛŞ - Li Mûşê gel tevî hewa sar jî li dora agirê Newrozê kom bû. Cîgira Serokê Koma DEM Partiyê Gulistan Kiliç Koçyîgît got, "Werin em nexşerêya Birêz Ocalan bigihînin her malê."

 

Pîrozbahiya Newrozê ya li Mûşê bi dirûşmên; ‘Rêbertiya Azad Civaka Demokratîk’ û ‘Civaka Demokratîk ji bo Azadiyê’ pêk hat. Qada Îstasyonê bi alên DEM Partiyê hat xemilandin. Welatî tevî hewaya sar û baranê jî di saetên sibê de li qadê kom bûn. Di pîrozbahiyên ku bi hezaran kes beşdar bûn de alên kesk, sor û zer hat vekirin. Hêjayî bi bîrxistinê bû ku piraniya beşdaran ciwan û jin bûn. Ji qadê gelek caran dirûşmên wekî; ‘Bijî Serok Apo’, ‘Jin, jiyan, azadî’ û ‘Newroz pîroz be’ hatin berzkirin.

 

 

Welatî li  gel baranê bi saetan govend gerandin. Bername piştî deqeyek rêzgirtinê ji bo bîranîna kesên di têkoşîna demokrasî û azadiyê de jiyana xwe ji dest dane destpê kir.

 

Hevşaredarê Mûşê Sirri Soylemez di pîrozbahiyê de axivî û wiha got: "Ev Newroz wê bibe Newroza demokrasî û aştiya civakî ya gelên Tirkiyeyê. Divê em hemû piştgirî û tevkariyê bidin vê pêvajoyê. Bi biryardariyeke têkoşînê ya hîn rêxistinbûyî re em bêhtir aştiyê biqîrin."

 

Hevşaredara Mûşê Tûba Sayilgan jî wiha got: "Gelê Kurd îsal ji her demê bêhtir nêzî serkeftin û aştiyê ye. Ev yek bi saya têkoşîna gelê me, biryardarî û biryardariya zarokên rojê ye." Tuba Sayilgan rojnamegerên hatin qetilkirin Mûsa Anter, Gurbeteli Ersoz, Cîhan Bîlgîn, Nazim Daştan û Azîz Koyluoglu bi bîr anî.

 

'BANGA OCALAN NEXŞERÊYA AŞTIYÊ YE'

 

Parlamentera DEM Partiyê ya Mûşê Sûmeyye Bozê balkişand ser banga Abdullah Ocalan û wiha got: "Banga Rêberê Gelê Kurd Abdullah Ocalan, nexşerêyeke girîng e ku wê ji bo hemû gel, nîjad û civakan aştiyê pêk bîne. Wezîfeya me wê mezinkirina têkoşîna me be, rêxistinbûn û yekîtiya xwe misoger bikin û civakeke demokratîk ava bikin."

 

Endama Komîteya Rêveber a Navendî ya DBP'ê Bêrîvan Helen Işik da zanîn ku dema wê hatiye ku azadiya fîzîkî ya Rêberê Gelê Kurd Abdullah Ocalan misoger bikin.

 

'DIVÊ EM BANGÊ JI HER KESÎ RE VEBÊJIN'

 

Cîgira Serokê Koma Partiyê ya DEM Partiyê Gulistan Kiliç Koçyîgît wiha axivî: "Em li pişt pêvajoya ji aliyê Birêz Ocalan ve hatiye pêşxistin in û em li cem wî ne. Baweriya me bi wî heye. Divê em nexşerêya ku birêz Ocalan daniye pêşiya xwe û banga dîrokî bigihînin her malê."

 

Gulîstan Kiliç Koçyîgît jî nerazîbûn nîşanî binçavkirina Şaredarê Bajarê Mezin ê Stenbolê Ekrem Îmamoglû da û wiha got: "Ji vê re darbe tê gotin, bêhûrmetiya li Destûra Bingehîn e. Bêrêziya li vîna gel e. Em vê yekê qet qebûl nakin." 

 

 

Piştî axaftinan agirê Newrozê hate pêxistin. Bi hezaran kesên ku qad tijî kirin, li gel stranên hunermend Bêwar govend gerandin.