NAVENDA NÛÇEYAN - Li tevahiya bajarên Bakur û Rojhilatê Sûriyeyê bi sedhezaran kes bi boneya komploya navneteweyî ya 15’ê Sibatê daketin qadan û bi daxwaza “Ji Abdullah Ocalan re azadî” meş lidar xistin. 

 

Bi boneya 26’emîn salvegera komploya navneteweyî ya 15’ê Sibatê ya li dijî Rêberê PKK’ê Abdullah Ocalan ku li Kenyayê hate revandin û radestî dewleta tirk htae kirin, li hemû bajarê Bakur û Rojhilatê Sûriyeyê gel daket qadan û şermezar kir. Li seranserî Bakur û Rojhilatê Sûriyeyê esnafan kepenk venekirin û ji 7 salî heta 70 salî bi sedhezaran kes bi daxwaza azadiya fîzîkî ya Abdullah Ocalan meşiyan. 

 

QAMIŞLO

 

Li Qamişloyê bi dirûşma “Em ê roja reş bikin roja azadiya Rêber Apo” mitîng hat lidarxistin. Bi deh hezaran şêniyên bajarê Qamişlo, Tirbespiyê, Til Hemîs û Amûdê li bajarê Qamişlo ya Kantona Cizîrê li Stadyuma 12 Adarê hatin ba hev û mitîngeke girseyî lidarxistin. Beriya mitîngê meşeke girseyî hate lidarxistin. Endama Desteya Hevserokatiya Partiya Yekitiya Demokratîk (PYD) Foza Yûsif,  komplo şermezar kir û got: “Dewleta Tirk a dagirker bi rêya vê komployê re xwest ku gelê Kurd bê îrade bihêlin û wan tune bikin. Lê ev roj bû roja berxwedaniya me ya li hember dijmin û me ji wê rojê ve soza têkoşînê da. Em ê tu carî jiyanek bêwelat nepejrînin. Em ê dijmin têk bibin û Rêberê xwe rizgar bikin.”

 

TEBQA

 

Bi hezaran şêniyên kantona Tebqayê jî bi hemû pêkhateyên xwe, şêx û rûspiyên eşîran, nûnerên Rêveberiya Xweser, partiyên siyasî, rêxistin û tevgerên jinan, kesayetên olî, rêxistinên civakî û koçberên ji kantona Efrîn û Şehbayê ji bo şermezarkirina 26’emîn salvegera Komploya Navneteweyî meşek li dar xist. Piştre jî mitîng hat lidarxistin. Mitîng bi gerandina dîlanê û berzkirina dirûşmên "Bê Serok jiyan nabe" bi dawî bû.

 

DERIK 

 

Înîsiyatîfa Gel a Ji Bo Azadiya Rêber Abdullah Ocalan li bajarê Dêrikê bi armanca şermezarkirina salvegera komploya 15’ê Sibatê, bi dirûşma "Em ê roja reş bikin roja azadiya Rêber Apo" li pêşiya Navenda Ciwanên Şoreşger mitîngek lidar xist.  Mitîng, bi deqeyek rêzgirtinê dest pê kir. Piştre jî Endama Rêveberiya Kongra Star a Dêrikê Wefa Elî axivî û diyar kir ku têkoşîna gelê Kurd û gelên cîhanê ya li dijî Komploya Navneteweyî wê heta azadiya fîzîkî ya Abdullah Ocalan bidome.

 

KOBANÊ

 

Li Kobanê jî bi tevlibûna dehhezaran kesan komploya navneteweyî hat şermezarkirin. Dayikan bi cil û bergên xwe û dirûşmên, ciwanan jî bi cilên xwe yên ku wêneyên Abdullah Ocalan li ser hebûn bal kişandin. Endama Koordînasyona Kongra Star a Kantona Firatê Arîn Ehmed di çalakiyê de axivî û diyar kir ku ew ê roja reş bikin roja azadiya fîzîkî ya Abdullah Ocalan.

 

HESEKÊ

 

Meclisa Bajarê Hesekê bi armanca şermezarkirina Komploya Navneteweyî ya 15’ê Sibatê li Qada Azadî ya bajarê Hesekê meş û çalakî li dar xist. Pêkhateyên Hesekê, Hol, Şedadê û Til Birakê tev li bûn. Qada mitîngê bi wêneyên Abdullah Ocalan û pankartên bi nivîsên "Bi têkoşîna gel em ê pergala Îmraliyê hilweşînin" û "Em ê roja reş veguherînin roja azadiya Rêber Apo" hate xemilandin. Ji rêveberên Meclisa Kongra Star a bajarê Şedadê Emîra Seîd axivî. Emîra Seîd diyar kir ku komploya navneteweyî heya roja îro dewam dike û got: “Rêber Abdullah Ocalan ne ji bo gelê Kurd tenê, lê ji bo tevahî gelên azadîxwaz re meşaleya azadiyê ye. Rêbertî roleke mezin di piştgirîkirina mafên jinan û şikandina bendên koletiyê de list û rêya azadiyê li pêşiya jinan vekir."

 

DÊRAZOR

 

Bi sedan şêniyên kantona Dêrazorê, rûspiyên eşîran, endamên saziyên sivîl, leşkerî, partiyên siyasî, rêxistinên jin û ciwanan bi meşeke girseyî Komploya Navneteweyî ya li dijî Abdullah Ocalan şermezar kir. Girse nêzî 2 kîlometreyan meşiya û li Pira Salihiyê ya heman herêmê sekinî û mitîngek hat lidarxistin. Piştî deqeya rêzgirtinê, şêwirmendê Rêveberiya Xweser a Kantona Dêrazorê Şiyar Mihemed axivî. Şiyar Mihemed anî ziman ku ji bo azadiya fîzîkî ya Abdullah Ocalan divê asta têkoşînê were bilindkirin.

 

REQA

 

Bi hezaran şêniyên bajarê Reqayê ji bo ku tev li meşa girseyî ya ji bo şermezarkirina Komploya Navneteweyî ya li dijî Abdullah Ocalan bibin, li Qada Jina Azad a bajar kom bûn. Meşê ji Qada Jina Azad ber bi Çerxerêya El Neîm dest pê kir û li Çerxerêya El Neîm veguherî mitîngê. Piştî rêzgirtinê cîgirê hevserokên Meclisa Rêveber a Rêveberiya Xweseriya Demokratîk a Bakur û Rojhilatê Sûriyê Hemdan El Ebid axivî û got: “Tişta ku Rêber Abdullah Ocalan li girtîgeha Îmraliyê kir, ronahiya azadî û rûmeta hemû gelan e. Me yekitiya Sûriyeyê parastiye û destê me ji bo aştî û diyalogê vekirî ye."

 

Meş bi qîrkirina dirûşmên "Bi can bi xwîn em bi te re ne Ocalan" bi dawî bû.

 

DÊRIK 

 

Înîsiyatîfa Gel a Ji Bo Azadiya Abdullah Ocalan li bajarê Dêrikê bi armanca şermezarkirina salvegera komploya 15’ê Sibatê, bi dirûşma "Em ê roja reş bikin roja azadiya Rêber Apo" li pêşiya Navenda Ciwanên Şoreşger mitîngek li dar xist. Di mitînga ku bi hezaran kes beşdar bûn de, wêneyên Abdullah Ocalan hatin hildan û dirûşmên, "Bê Serok jiyan nabe" û "Azadiya Ocalan azadiya gelên herêmê ye" hatin berzkirin. Piştî deqeyek rêzgirtinê Endama Rêveberiya Kongra Star a Dêrikê Wefa Elî axivî û diyar kir ku têkoşîna gelê Kurd û gelên cîhanê ya li dijî Komploya Navneteweyî wê heta azadiya fîzîkî ya Abdullah Ocalan bidome.

 

Di heman demê de li Girkê Legê, Hol, Til Berak, Şedad, taxên Eşrefiye û Şêxmeqsûd ên Helebê û gelek navçe û bajarokên din bi meş û daxuyaniyan komplo şermezar kirin.